jis qadar jazb-e-mohabbat kaa asar hotaa gayaa — Qamar Moradabadi

muddaton baad jo is raah se guzraa huun 'qamar'
ahd-e-rafta ko bahut yaad kiyaa hai main ne

harf aane na diyaa ishq ki khuddaari par
kaam naakaam tamannaa se liyaa hai main ne

kisi ki raah mein kaanTe kisi ki raah mein phuul
hamaari raah mein tufaan hai dekhiye kyaa ho

gham ki tauhin na kar gham ki shikaayat kar ke
dil rahe yaa na rahe azmat-e-gham rahne de

yuun na milne ke sau bahaane hain
milne vaale kahaan nahin milte

qadam uThe bhi nahin bazm-e-naaz ki jaanib
khayaal abhi se pareshaan hai dekhiye kyaa ho

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

sabhi se jab mohabbat chaahte ho
mohabbat kyon nahin karte sabhi se

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

husn jalva dikhaa gayaa apnaa
ishq baiThaa rahaa udaas kahin

dil-e-haris hi apnaa na ho sakaa qaane
vagarna tere karam mein to kuchh kami na rahi