jo mire sochne ki baatein hain — Samar Kabir

raat basti jali gharibon ki
subh akhbaar ho gae raushan

qadam qadam pe mire khvaab jal rahe hain yahaan
main is zamin ko jannat banaane aayaa thaa

meri mazduri ke paise mujhe de do maalik
aaj beTi miri sasuraal se aai hui hai

vo meri tegh se martaa to kyaa maza aataa
usi ke tiir se us kaa shikaar karnaa thaa

qusur in shaa'iron kaa bhi nahin hai
vahi deinge jo ye baazaar bole

miyaan majnun to kab ke mar chuke hain
magar haathon mein patthar hai abhi tak

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

kharidaari hai shahd o shiir o qasr o huur o ghilmaan ki
gham-e-din bhi agar samjho to ik dhandaa hai duniyaa kaa

tumhaari aankhon ki tauhin hai zaraa socho
tumhaaraa chaahne vaalaa sharaab piitaa hai

vo ajab ghaDi thi main jis ghaDi liyaa dars nuskha-e-ishq kaa
ki kitaab aql ki taaq par juun dhari thi tyuun hi dhari rahi

phir jaa rukegi bujhte kharaabon ke des mein
suuni sulagti sochti sunsaan si saDak