chashm-e-khush-aab ki tamsil mein rahne vaale — Shahid Kamal

haan vaz-e-ehtiyaat kaa qaail nahin huun mein
jo zakhm hai jigar mein chhupaane se main rahaa

jab Duub ke marnaa hai to kyaa soch rahe ho
in jhiil si aankhon mein utar kyuun nahin jaate

jang kaa shor bhi kuchh der to tham saktaa hai
phir se ik amn ki afvaah uDaa di jaae

tu mere saath nahin hai to sochtaa huun main
ki ab to tujh se bichhaDne kaa koi Dar bhi nahin

shaakh-e-mizhgaan pe mahakne lage zakhmon ke gulaab
pichhle mausam ki mulaaqaat ki bu zinda hai

burida-sar ko sajaa de fasil-e-neza par
darida jism ko phir arsa-e-qitaal mein rakh

gham hai na ab khushi hai na ummid hai na yaas
sab se najaat paae zamaane guzar gae

aaina to 'aibon ki khabar detaa hai 'aasif'
khush-fahmi-e-insaan kaa magar koi kare kyaa

kaun si aisi kami mere khad-o-khaal mein hai
aaina khush nahin hotaa kabhi mil kar mujh se

tum aake lauT gae phir bhi ho yahin maujud
tumhaare jism ki khushbu mire makaan mein hai

ye zindagi hai apni kabhi khush kabhi udaas
is kashmakash se mujh ko khudaayaa rihaai de

nahin nahin main bahut khush rahaa huun tere baghair
yaqin kar ki ye haalat abhi abhi hui hai