buz-dili hogi charaaghon ko dikhaanaa aankhein — Shakeel Badayuni

har dil mein chhupaa hai tiir koi har paanv mein hai zanjir koi
puchhe koi in se gham ke maze jo pyaar ki baatein karte hain

'shakil' is darja maayusi shuru-e-ishq mein kaisi
abhi to aur honaa hai kharaab aahista aahista

be-taalluq tire aage se guzar jaataa hai
ye bhi ik husn-e-talab hai tire divaane kaa

ai mohabbat tire anjaam pe ronaa aayaa
jaane kyuun aaj tire naam pe ronaa aayaa

ab to khushi kaa gham hai na gham ki khushi mujhe
be-his banaa chuki hai bahut zindagi mujhe

shaguftagi-e-dil-e-kaarvaan ko kyaa samjhe
vo ik nigaah jo uljhi hui bahaar mein hai

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

ham mein baaqi nahin ab khaalid-e-jaan-baaz kaa rang
dil pe ghaalib hai faqat hafiz-e-shiraaz kaa rang

dil ki taklif kam nahin karte
ab koi shikva ham nahin karte

ashk Dhalte nahin dekhe jaate
dil pighalte nahin dekhe jaate

ye do-dili mein rahaa ghar na ghaaT kaa 'anjum'
buton ko kar na sakaa khush khudaa ko paa na sakaa