hamaari aankh ke aansu sameTo — Sultan Shaafi

vahshat ne mujh hasin ko behaal kar diyaa
kamzor dil ke log na dekhein miri taraf

puchh mujh se ki kis tarah main ne
teri tasvir pe guzaaraa kiyaa

haalaanki ek shakhs tumhaari jagah pe hai
lekin tumhaaraa is se khalaa bhar nahin rahaa

ik samt ghar ke log hain ik samt 'ishq hai
ai naujavaan laDki himaaqat ki baat hai

dekh aansu na qaid ho jaae
meri tasvir khinchne vaale

main tere hote hue ghair ki panaah mein huun
mire habib ye tujh par 'azaab hai shaayad

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

sunaa ye hai ki vo suufi bhi thaa vali bhi thaa
ab is ke baa'd to paighambari kaa darja hai

anjaane logon ko har su chaltaa phirtaa dekh rahaa huun
kaisi bhiiD hai phir bhi khud ko tanhaa tanhaa dekh rahaa huun

sulag rahaa huun khud apni hi aag mein kab se
ye mashghala to mire dard ki asaas na thaa