phir chaae mein biscuit ki tarah bhuki si ye shaam — Swapnil Tiwari

baDe hi ghusse mein ye kah ke us ne vasl kiyaa
mujhe to tum se koi baat hi nahin karni

ye zindagi jo pukaare to shak saa hotaa hai
kahin abhi to mujhe khud-kushi nahin karni

saaraa ghussa ab bas is kaam aataa hai
ham is se cigarette sulgaayaa karte hain

kab tak chunari par hi zulm hon rangon ke
rangreza teri bhi qabaa par barse rang

aur kam yaad aaogi agle baras tum
ab ke kam yaad aai ho pichhle baras se

agar dobaara bani ye duniyaa
to pahle teri gali banegi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

maarka garm to ho lene do khun-rezi kaa
pahle shamshir ke niche hamin jaa baiTheinge

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

vaqt hai ab namaaz-e-maghrib kaa
chaand rukh lab shafaq hai gesu shaam