ab vo raunaq hi nahin kis liye chhat par jaaun — Syed Adeel Gilanii

ek muddat se tiri diid ki pyaasi aankhein
raah takte hue binaai ganvaa baiThi hain

vo log jo ki 'ishq ke ab tak asiir the
guzri kahaaniyon ke fasaane lage mujhe

raat ki taarikiyon mein hai darakhshaan daagh-e-dil
chaand kahte phir rahe hain log mere zakhm ko

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ghazal mein jab talak ehsaas ki shiddat na ho shaamil
faqat alfaaz ki kaarigari mahsus hoti hai

gul kiyaa jis ne vo thaa aur magar
shama ne shikva havaaon se kiyaa

maarka garm to ho lene do khun-rezi kaa
pahle shamshir ke niche hamin jaa baiTheinge

shama kaa shaana-e-iqbaal hai taufiq-e-karam
ghuncha gul hote hi khud saahab-e-zar hotaa hai

kyaa huaa viraan kiyaa gar mohtasib ne mai-kada
jama phir kal shaam tak har ek shai ho jaaegi