achchhaa hai ki sirf ishq kiije — Tauseef Tabassum

dukh jhelo to ji kaDaa hi rakhnaa
dil hai to hisaab-e-dostaan hai

kyaa ye sach hai ki khizaan mein bhi chaman khilte hain
mere daaman mein lahu hai to mahaktaa kyaa hai

dil bayaaz-e-umr ki auraaq-gardaani mein hai
kyaa khabar hai kaun saa safha khulaa rah jaaegaa

kaun se dukh ko palle baandhein kis gham ko tahrir karein
yaan to dard sivaa hotaa hai aur bhi arz-e-haal ke baad

jo bhi narmi hai khayaalon mein na hone se hai
khvaab aankhon se nikal jaaein to patthar ho jaaein

paanv mein lipTi hui hai sab ke zanjir-e-anaa
sab musaafir hain yahaan lekin safar mein kaun hai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

'ishq mein intihaa ki had na hui
'aashiqi teri mustanad na hui

mohabbat phuul banne par lagi thi
palaT kar phir kali kar li hai main ne

kuchh aur vus'atein darkaar hain mohabbat ko
visaal-o-hijr pe daar-o-madaar mushkil hai

sunte hain ishq naam ke guzre hain ik buzurg
ham log bhi faqir usi silsile ke hain