Tauseef Tabassum

dukh jhelo to ji kaDaa hi rakhnaa
dil hai to hisaab-e-dostaan hai

kyaa ye sach hai ki khizaan mein bhi chaman khilte hain
mere daaman mein lahu hai to mahaktaa kyaa hai

dil bayaaz-e-umr ki auraaq-gardaani mein hai
kyaa khabar hai kaun saa safha khulaa rah jaaegaa

kaun se dukh ko palle baandhein kis gham ko tahrir karein
yaan to dard sivaa hotaa hai aur bhi arz-e-haal ke baad

jo bhi narmi hai khayaalon mein na hone se hai
khvaab aankhon se nikal jaaein to patthar ho jaaein

paanv mein lipTi hui hai sab ke zanjir-e-anaa
sab musaafir hain yahaan lekin safar mein kaun hai

achchhaa hai ki sirf ishq kiije
ye umr to yuun bhi raaegaan hai

shauq kahtaa hai ki har jism ko sajda kiije
aankh kahti hai ki tu ne abhi dekhaa kyaa hai

dil ki baazi haar ke roe ho to ye bhi sun rakkho
aur abhi tum pyaar karoge aur abhi pachhtaaoge

dekhne vaali agar aankh ko pahchaan sakein
rang khud parda-e-tasvir se baahar ho jaaein