niind aae to kuchh suraagh mile — Tripurari

kitni dilkash hain ye baarish ki phuvaarein lekin
aisi baarish mein miri jaan bhi jaa sakti hai

jab se guzraa hai kisi husn ke baazaar se dil
dil ko mahsus ye hotaa hai ki baazaar huun main

main tire jism ke jab paar nikal jaaungaa
vasl ki raat baDi ghaur-talab hogi vo

jin se milnaa na huaa un se bichhaD kar roe
ham to aankhon ki har ik had se guzar kar roe

kai laashein hain mujh mein dafn yaani
main qabristaan huun shuruaat hi se

tum jise chaand kahte ho vo asl mein
aasmaan ke badan par koi ghaav hai

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

khvaabon ke ufuq par tiraa chehra ho hamesha
aur main usi chehre se nae khvaab sajaaun

khvaabon ki tarah aanaa khushbu ki tarah jaanaa
mumkin hi nahin lagtaa ai dost tujhe paanaa

dene vaale tu mujhe niind na de khvaab to de
mujh ko mahtaab se aage bhi kahin jaanaa hai

dhund mein kho ke rah gaiin suratein mehr-o-maah si
vaqt ki gard ne unhein khvaab-o-khayaal kar diyaa