raaz-e-dil hain puchhte aur bolne dete nahin — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

kabhi main apne haathon ki lakiron se nahin uljhaa
mujhe maalum hai qismat kaa likkhaa bhi badaltaa hai

abhi raah mein kai moD hain koi aaegaa koi jaaegaa
tumhein jis ne dil se bhulaa diyaa use bhulne ki duaa karo

dil-e-bad-khu ki kisi tarah raunat kam ho
chaahtaa huun vo sanam jis mein mohabbat kam ho

bazm-e-falak mein kaun hai us ki raa'naai kaa mahram-e-raaz
kis ko apne daaman-e-dil ke daagh dikhaaegaa mahtaab