Shehla Kaleem

haasil huaa hai tujh ko mujhi se shu'ur-e-zaat
main teraa aaina huun miraa ehtiraam kar

kuza-gar kis ko mayassar rahi fursat teri
kyon hamein chaak se 'ujlat mein utaaraa tu ne

mo'jizaat-e-dast-e-kun dekhne the so ham ne
pattharon pe de maaraa khud ko aaina kar ke

agar main chaahun bas ik chaal se ulaT duun bisaat
mujhe khabar hai kahaan kis ne daao khelaa hai

shikastagi thi kuchh aisi ki kuza-gar meraa
banaa ke mujh ko baDi der tak udaas rahaa

ai naqsh-gar yaqin kar achchhaa nahin banaa
laa phir se kaaenaat kaa naqsha banaaun main

bachchon ke haath mein bhalaa dete hain aisi chiiz
dekho kharaab ho gai mujh se ye zindagi

bazm-e-falak mein kaun hai us ki raa'naai kaa mahram-e-raaz
kis ko apne daaman-e-dil ke daagh dikhaaegaa mahtaab

kyaa paa sakegi duniyaa hamaare dukhon kaa ramz
rote hain qahqahon se to hanste hain phuuT ke

palaT ke harzaa-saraaon ko kis liye duun javaab
bhalaa bataao ye laaiq hain munh lagaane ke