shab palang par haanpte saae rahe — Yusuf Taqi

be-sadaa kyuun guzarte ho aavaaz do
ab bhi kuchh log andar makaanon mein hain

aao puraani yaad ke shoalon mein taap lein
kitne hain haath sard mulaaqaat ki tarah

ai paDosi tu bataa ham ko to kuchh hosh nahin
thaa hamaaraa bhi koi ghar tire ghar se pahle

dekhaa to zindagi mein bahut kaamyaab the
sochaa to jiit aai nazar maat ki tarah

khaansti maddham si ik aavaaz jab se kho gai
ghairiyat ki bu se mahkaa mujh ko apnaa ghar milaa

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

rok do ye raushni ki tez dhaar
meri miTTi mein gundhi hai raat bhi

baarish ke baa'd raat saDak aaina si thi
ik paanv paaniyon pe paDaa chaand hil gayaa

aankhon mein nahin silsila-e-ashk shab-o-roz
tasbih paDhaa karte hain din raat tumhaari