kyaa jaane kyuun jalti hai — Zafar Tabish

manzar se laa-manzar tak
aankhein khaali khaali hain

jab bhi jhuk kar miltaa huun main logon se
ho jaataa huun apne qad se unchaa main

na kaho tum bhi kuchh na ham bolein
aao khaamoshiyon ke lab kholein

basti basti jangal jangal ghumaa main
lekin apne ghar mein aa kar soyaa main

so rahe the shahr bhi jangal bhi jab
ro rahaa thaa niilaa ambar TuuT kar

ba-zaahir yuun to main simTaa huaa huun
agar socho to phir bikhraa huaa huun

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

khauf har ghar se jhaanktaa hogaa
shahr ik dasht-e-be-sadaa hogaa

main bhi shaayad aap ko tanhaa milon
apni tanhaai mein jaa kar dekhiye

ik saaneha saa dafn huun lekin kabhi kabhi
sadiyon ki qabr se bhi uThaayaa gayaa huun main