itnaa sochaa tujhe ki duniyaa ko — Zia Jalandhari

buraa na maan 'ziyaa' us ki saaf-goi kaa
jo dard-mand bhi hai aur be-adab bhi nahin

rang baatein karein aur baaton se khushbu aae
dard phulon ki tarah mahke agar tu aae

himmat hai to buland kar aavaaz kaa alam
chup baiThne se hal nahin hone kaa masala

ishq mein bhi koi anjaam huaa kartaa hai
ishq mein yaad hai aaghaaz hi aaghaaz mujhe

ye aansu ye pashemaani kaa izhaar
mujhe ik baar phir bahkaa gai ho

abr-e-aavaara se mujh ko hai vafaa ki ummid
barq-e-betaab se shikva hai ki paainda nahin

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

azaab-e-daanish-e-haazir se baa-khabar huun main
ki main is aag mein Daalaa gayaa huun misl-e-khalil

sunaa hai vo mire baare mein sochtaa hai bahut
khabar to hai hi magar mo'tabar zyaada nahin

maango samundaron se na saahil ki bhiik tum
haan fikr o fan ke vaaste gahraai maang lo

bagulaa jin ke sar par chatr-e-shaahi hai zamin masnad
vahi aqlim-e-gham mein aah ki naubat bajaate hain