dasht-o-dariyaa ki ibtidaa se hain — Zulfiqar Aadil

yuun uThe ik din ki logon ko huaa
abr kaa dhokaa hamaari khaak par

vaapas palaT rahe hain azal ki talaash mein
mansukh aap apnaa likhaa kar rahe hain ham

baiThe baiThe isi ghubaar ke saath
ab to uDnaa bhi aa gayaa hai mujhe

ye kis ne haat peshaani pe rakkhaa
hamaari niind puuri ho gai hai

ravaani mein nazar aataa hai jo bhi
use taslim kar lete hain paani

baiThe baiThe pheink diyaa hai aatish-daan mein kyaa kyaa kuchh
mausam itnaa sard nahin thaa jitni aag jalaa li hai

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

phir ret ke dariyaa pe koi pyaasaa musaafir
likhtaa hai vahi ek kahaani kai din se

shahr ho dasht-e-tamannaa ho ki dariyaa kaa safar
teri tasvir ko siine se lagaa rakkhaa hai

ho gayaa charkh-e-sitamgar kaa kaleja ThanDaa
mar gae pyaas se dariyaa ke kinaare bachche

muddaton baa'd pashemaan huaa dariyaa ham se
muddaton baa'd hamein pyaas chhupaani aai

fazaa kaa tang honaa fitrat-e-aazaad se puchho
par-e-parvaaz hi kyaa jo qafas ko aashiyaan samjhe