Alok Yadav

یہ راستے یہ نظارے بہار کا عالم ترے بغیر دل بے قرار کا عالم دھڑک اٹھے ہے ترا ذکر بھی اگر آئے یہ مرے دل پہ ترے اختیار کا عالم تجھے خیال بھی آئے نہ دور جانے کا جو دیکھ لے تو مرے انتظار کا عالم حسد نہ ہو جو رقیبوں کے ساتھ بھی دیکھوں تری وفا پہ مرے اعتبار کا عالم کبھی تو آئے رلانے مجھے کوئی آلوکؔ کبھی تو ہو مرے دل میں قرار کا عالم

ye raaste ye nazaare bahaar kaa aalam

اک ذرا سی چاہ میں جس روز بک جاتا ہوں میں آئنہ کے سامنے اس دن نہیں آتا ہوں میں رنج غم اس سے چھپاتا ہوں میں اپنے لاکھ پر پڑھ ہی لیتا ہے وہ چہرہ پھر بھی جھٹلاتا ہوں میں قرض کیا لایا میں خوشیاں زندگی سے ایک دن روز کرتی ہے تقاضہ اور جھنجھلاتا ہوں میں حوصلہ تو دیکھیے میرا غزل کی کھوج میں اپنے ہی سینے میں خنجر سا اتر جاتا ہوں میں دے سزائے موت یا پھر بخش دے تو زندگی کش مکش سے یار تیری سخت گھبراتا ہوں میں مون وہ پڑھتا نہیں اور شبد بھی سنتا نہیں جو بھی کہنا چاہتا ہوں کہہ نہیں پاتا ہوں میں خواب سچ کرنے چلا تھا گاؤں سے میں شہر کو نیند بھی کھو کر یہاں آلوکؔ پچھتاتا ہوں میں

ik zaraa si chaah mein jis roz bik jaataa huun main

ہر ایک ذہن میں سارا حساب رہتا ہے سوال سننے سے پہلے جواب رہتا ہے وہ ایک موڑ جہاں ایک دن لٹا تھا میں وہیں مرا دل خانہ خراب رہتا ہے ہوا کے دم پہ ہے جب زندگی کا دار و مدار تو کیوں غرور تجھے اے حباب رہتا ہے چلے گی چال کوئی گردش فلک شاید کئی دنوں سے بڑا اضطراب رہتا ہے وہ جھولی کیسے بھرے پیار کرنے والوں کی اسی فراق میں ٹوٹا شہاب رہتا ہے مرے لیے ہیں مصیبت یہ آئنہ خانے یہاں ضمیر مرا بے نقاب رہتا ہے حسین خواب ہوں کتنے ہی پر کوئی آلوکؔ تمام عمر کہاں محو خواب رہتا ہے

har ek zehn mein saaraa hisaab rahtaa hai

بعض خط پر اثر بھی ہوتے ہیں نامہ بر چارہ گر بھی ہوتے ہیں حسن کی دل کشی پہ ناز نہ کر آئنے بد نظر بھی ہوتے ہیں تم ہوئے ہم سفر تو یہ جانا راستے مختصر بھی ہوتے ہیں جان دینے میں سر بلندی ہے پیار کا مول سر بھی ہوتے ہیں اک ہمیں منتظر نہیں آلوکؔ منتظر بام و در بھی ہوتے ہیں

baaz khat pur-asar bhi hote hain

بہاروں کے نئے موسم بلاتے رہ گئے نظر میں تو رہا ہم جاتے جاتے رہ گئے دیوانہ ایک دل کی بات کہہ کر چل دیا مہذب لوگ سارے کسمساتے رہ گئے کسی نے حال پوچھا تھا بس اتنی بات تھی مری آنکھوں میں آنسو آتے آتے رہ گئے بہت چرچے تھے جس در کی سخاوت کے یہاں وہ اوروں پر کھلا ہم سر جھکاتے رہ گئے وہ پہلے مسکرائے پھر لیا پہلو بدل ہمیں نادان تھے بس مسکراتے رہ گئے

bahaaron ke nae mausam bulaate rah gae

سبز ہے پیرہن چاند کا آج پھر رنگ رخسار ہے سرخ سا آج پھر کر گئی کام تیری ادا آج پھر صحن گل نے کہا مرحبا آج پھر تیرے پیکر کو چھو کر چلی آئی ہے مرمریں ہے بدن رات کا آج پھر لے کے آغوش میں چاند کو آسماں منہ زمیں کو چڑھاتا رہا آج پھر یاد چندن ونوں سے گزرتی رہی من میں صندل مہکتا رہا آج پھر دل کی ناکامیاں ہی خطاوار ہیں وہ گناہوں کا ہے دیوتا آج پھر چاند سورج ہوئے آمنے سامنے امتحاں ساگروں کا رہا آج پھر آؤ آلوکؔ سیر چمن کو چلیں اٹھ کے آئی ہے کالی گھٹا آج پھر

sabz hai pairahan chaand kaa aaj phir