Shayari Of Ameer Minai

vo phuul sar chaḌhā jo chaman se nikal gayā
izzat use milī jo vatan se nikal gayā

hai javānī ḳhud javānī kā siñgār
sādgī gahna hai is sin ke liye

kartā maiñ dardmand tabīboñ se kyā rujūa
jis ne diyā thā dard baḌā vo hakīm thā

vasl ho jaa.e yahīñ hashr meñ kyā rakkhā hai
aaj kī baat ko kyuuñ kal pe uThā rakkhā hai

achchhe iisā ho marīzoñ kā ḳhayāl achchhā hai
ham mare jaate haiñ tum kahte ho haal achchhā hai

tujh se māñgūñ maiñ tujhī ko ki sabhī kuchh mil jaa.e
sau savāloñ se yahī ek savāl achchhā hai

baaqī na dil meñ koī bhī yā rab havas rahe
chaudah baras ke sin meñ vo lākhoñ baras rahe

vasl kā din aur itnā muḳhtasar
din gine jaate the is din ke liye

āñkheñ dikhlāte ho joban to dikhāo sāhab
vo alag bāñdh ke rakkhā hai jo maal achchhā hai

gaahe gaahe kī mulāqāt hī achchhī hai 'amīr'
qadr kho detā hai har roz kā aanā jaanā

maañg luuñ tujh se tujhī ko ki sabhī kuchh mil jaa.e
sau savāloñ se yahī ek savāl achchhā hai

hañs ke farmāte haiñ vo dekh ke hālat merī
kyuuñ tum āsān samajhte the mohabbat merī