Anjum Rehbar

آگ بہتے ہوئے پانی میں لگانے آئی تیرے خط آج میں دریا میں بہانے آئی پھر تری یاد نئے خواب دکھانے آئی چاندنی جھیل کے پانی میں نہانے آئی دن سہیلی کی طرح ساتھ رہا آنگن میں رات دشمن کی طرح جان جلانے آئی میں نے بھی دیکھ لیا آج اسے غیر کے ساتھ اب کہیں جا کے مری عقل ٹھکانے آئی زندگی تو کسی رہزن کی طرح تھی انجمؔ موت رہبر کی طرح راہ دکھانے آئی

aag bahte hue paani mein lagaane aai

رنگ اس موسم میں بھرنا چاہئے سوچتی ہوں پیار کرنا چاہئے زندگی کو زندگی کے واسطے روز جینا روز مرنا چاہئے دوستی سے تجربہ یہ ہو گیا دشمنوں سے پیار کرنا چاہئے پیار کا اقرار دل میں ہو مگر کوئی پوچھے تو مکرنا چاہئے

rang is mausam mein bharnaa chaahiye

کچھ دن سے زندگی مجھے پہچانتی نہیں یوں دیکھتی ہے جیسے مجھے جانتی نہیں وہ بے وفا جو راہ میں ٹکرا گیا کہیں کہہ دوں گی میں بھی صاف کہ پہچانتی نہیں سمجھایا بارہا کہ بچو پیار ویار سے لیکن کوئی سہیلی کہا مانتی نہیں میں نے تجھے معاف کیا جا کہیں بھی جا میں بزدلوں پہ اپنی کماں تانتی نہیں انجمؔ پہ ہنس رہا ہے تو ہنستا رہے جہاں میں بےوقوفیوں کا برا مانتی نہیں

kuchh din se zindagi mujhe pahchaanti nahin

تم کو بھلا رہی تھی کہ تم یاد آ گئے میں زہر کھا رہی تھی کہ تم یاد آ گئے کل میری ایک پیاری سہیلی کتاب میں اک خط چھپا رہی تھی کہ تم یاد آ گئے اس وقت رات رانی مرے سونے صحن میں خوشبو لٹا رہی تھی کہ تم یاد آ گئے ایمان جانئے کہ اسے کفر جانئے میں سر جھکا رہی تھی کہ تم یاد آ گئے کل شام چھت پہ میر تقی میرؔ کی غزل میں گنگنا رہی تھی کہ تم یاد آ گئے انجمؔ تمہارا شہر جدھر ہے اسی طرف اک ریل جا رہی تھی کہ تم یاد آ گئے

tum ko bhulaa rahi thi ki tum yaad aa gae

جن کے آنگن میں امیری کا شجر لگتا ہے ان کا ہر عیب زمانے کو ہنر لگتا ہے چاند تارے مرے قدموں میں بچھے جاتے ہیں یہ بزرگوں کی دعاؤں کا اثر لگتا ہے ماں مجھے دیکھ کے ناراض نہ ہو جائے کہیں سر پہ آنچل نہیں ہوتا ہے تو ڈر لگتا ہے

jin ke aangan mein amiri kaa shajar lagtaa hai

ملنا تھا اتفاق بچھڑنا نصیب تھا وہ اتنی دور ہو گیا جتنا قریب تھا میں اس کو دیکھنے کو ترستی ہی رہ گئی جس شخص کی ہتھیلی پہ میرا نصیب تھا بستی کے سارے لوگ ہی آتش پرست تھے گھر جل رہا تھا اور سمندر قریب تھا مریم کہاں تلاش کرے اپنے خون کو ہر شخص کے گلے میں نشان صلیب تھا دفنا دیا گیا مجھے چاندی کی قبر میں میں جس کو چاہتی تھی وہ لڑکا غریب تھا

milnaa thaa ittifaaq bichhaDnaa nasib thaa