Junaid Hazin Lari

dekha nahin vo chand sa chehra ka.i din se
tarik nazar aati hai duniya ka.i din se

qatra na ho to bahr na aa.e vajud men
paani ki ek buund samundar se kam nahin

udasiyan hain jo din men to shab men tanha.i
basa ke dekh liya shahr-e-arzu main ne

usi ko dasht-e-khizan ne kiya bahut pamal
jo phuul sab se hasin mausam-e-bahar men tha

gham de gaya nashat-e-shanasa.i le gaya
vo apne saath apni masiha.i le gaya

kaliyon men tazgi hai na phulon men baas hai
tere baghair saara gulistan udaas hai

qatra na ho to bahr na aae vajud mein
paani ki ek buund samundar se kam nahin

dekhaa nahin vo chaand saa chehraa kai din se
taarik nazar aati hai duniyaa kai din se

vo saadgi mein bhi hai ajab dilkashi liye
is vaaste ham us ki tamannaa mein ji liye

tiri talaash mein nikle to itni duur gae
ki ham se tai na hue faasle judaai ke

ajab bahaar dikhaai lahu ke chhinTon ne
khizaan kaa rang bhi rang-e-bahaar jaisaa thaa

ik sham-e-aarzu ki haqiqat hi kyaa magar
tufaan mein ham charaagh jalaae hue to hain