Salam Machhli Shahri

yuun hi aankhon mein aa gae aansu
jaaiye aap koi baat nahin

ai mire ghar ki fazaaon se gurezaan mahtaab
apne ghar ke dar-o-divaar ko kaise chhoDun

ab maa-hasal hayaat kaa bas ye hai ai 'salaam'
cigarette jalaai sher kahe shaadmaan hue

gham musalsal ho to ahbaab bichhaD jaate hain
ab na koi dil-e-tanhaa ke qarin aaegaa

kabhi kabhi arz-e-gham ki khaatir ham ik bahaanaa bhi chaahte hain
jab aansuon se bhari hon aankhein to muskuraanaa bhi chaahte hain

raat dil ko thaa sahar kaa intizaar
ab ye gham hai kyuun saveraa ho gayaa

tum sharaab pi kar bhi hosh-mand rahte ho
jaane kyuun mujhe aisi mai-kashi nahin aai

kaash tum samajh saktin zindagi mein shaaer ki aise din bhi aate hain
jab usi ke parvarda chaand us pe hanste hain phuul muskuraate hain

shukriya ai gardish-e-jaam-e-sharaab
main bhari mahfil mein tanhaa ho gayaa

vo dil se tang aa ke aaj mahfil mein husn ki tamkanat ki khaatir
nazar bachaanaa bhi chaahte hain nazar milaanaa bhi chaahte hain

meri fikr ki khushbu qaid ho nahin sakti
yuun to mere honTon par maslahat kaa taalaa hai

vo sirf main huun jo sau jannatein sajaa kar bhi
udaas udaas saa tanhaa dikhaai dene lage