mo'jizaat-e-dast-e-kun dekhne the so ham ne — Shehla Kaleem

haasil huaa hai tujh ko mujhi se shu'ur-e-zaat
main teraa aaina huun miraa ehtiraam kar

kuza-gar kis ko mayassar rahi fursat teri
kyon hamein chaak se 'ujlat mein utaaraa tu ne

agar main chaahun bas ik chaal se ulaT duun bisaat
mujhe khabar hai kahaan kis ne daao khelaa hai

shikastagi thi kuchh aisi ki kuza-gar meraa
banaa ke mujh ko baDi der tak udaas rahaa

ai naqsh-gar yaqin kar achchhaa nahin banaa
laa phir se kaaenaat kaa naqsha banaaun main

bachchon ke haath mein bhalaa dete hain aisi chiiz
dekho kharaab ho gai mujh se ye zindagi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe