جھک کے چلتا ہوں کہ قد اس کے برابر نہ لگے دوسرا یہ کہ اسے راہ میں ٹھوکر نہ لگے یہ ترے ساتھ تعلق کا بڑا فائدہ ہے آدمی ہو بھی تو اوقات سے باہر نہ لگے نیم تاریک سا ماحول ہے درکار مجھے ایسا ماحول جہاں آنکھ لگے ڈر نہ لگے ماؤں نے چومنا ہوتے ہیں بریدہ سر بھی ان سے کہنا کہ کوئی زخم جبیں پر نہ لگے یہ جو آئینہ ہے دیکھوں تو خلا دکھتا ہے اس جگہ کچھ بھی نہ لگواؤں تو بہتر نہ لگے یہ طلب گار نگاہوں کے تقاضے ہر سو کوئی تو ایسی جگہ ہو جو مجھے گھر نہ لگے بانجھ فنکار ہے جس پر کوئی تنقید نہ ہو بے ثمر ہوتا ہے جس پیڑ کو پتھر نہ لگے تم نے چھوڑا تو کسی اور سے ٹکراؤں گا میں کیسے ممکن ہے کہ اندھے کا کہیں سر نہ لگے

غزل · Ghazal

mujhe pahle to lagtaa thaa ki zaati masala hai

مجھے پہلے تو لگتا تھا کہ ذاتی مسئلہ ہے میں پھر سمجھا محبت کائناتی مسئلہ ہے پرندے قید ہیں تم چہچہاہٹ چاہتے ہو تمہیں تو اچھا خاصا نفسیاتی مسئلہ ہے ہمیں تھوڑا جنوں درکار ہے تھوڑا سکوں بھی ہماری نسل میں اک جینیاتی مسئلہ ہے بڑی مشکل ہے بنتے سلسلوں میں یہ توقف ہمارے رابطوں کی بے ثباتی مسئلہ ہے وہ کہتے ہیں کہ جو ہوگا وہ آگے جا کے ہوگا تو یہ دنیا بھی کوئی تجرباتی مسئلہ ہے ہمارا وصل بھی تھا اتفاقی مسئلہ تھا ہمارا ہجر بھی ہے حادثاتی مسئلہ ہے

غزل · Ghazal

main chhupne ke liye har din jagah badalne lagaa

میں چھپنے کے لیے ہر دن جگہ بدلنے لگا مگر وہ تیر چلایا تھا جو اجل نے لگا کوئی اسٹیج پر آیا تو اٹھ کھڑے ہوئے سب میں پستہ قد تھا ذرا دور تھا اچھلنے لگا ٹرین چلنے لگی اور اضطراب میں میں بجائے ہاتھ ہلانے کے ہاتھ ملنے لگا ہوا نے دیپ بجھایا نہ تھا الٹ دیا تھا ذرا سی دیر میں سارا مکان جلنے لگا تو زندگی سے نکل جائے عین ممکن ہے مگر تو میرے اثر سے نہیں نکلنے لگا ذرا نگاہ جمائی اور ایک برف سا جسم پسینہ بن کے جبیں سے ذرا پگھلنے لگا یے گل فروش رفوگر سنار فارغ تھے کسی کے آنے سے ان سب کا کام چلنے لگا

غزل · Ghazal

ba-vaqt-e-'asr jab ashyaa ke saae baDhne lage

بوقت عصر جب اشیا کے سایہ بڑھنے لگے ہم اک مکاں کی طرف سر جھکائے بڑھنے لگے کسی گلی میں کرائے پہ گھر لیا اس نے پھر اس گلی میں گھروں کے کرائے بڑھنے لگے میں چاہتا ہوں کہ اب ہم سمندروں کے بیچ زمیں نگلتی کوئی آبنائے بڑھنے لگے پھر آج گھر سے نکل کر نئی تھکن کی طرف پرانے دن کی تھکن کو اٹھائے بڑھنے لگے تھی ترک نسبت و ترکہ میں نسبت معکوس سو جائیداد گھٹی تو پرائے بڑھنے لگے میں چاہتا ہوں تو میرے خلاف بولا کر میں چاہتا ہوں ترے حق میں رائے بڑھنے لگے کسی بھی شے کا جنوں بھوکھ کی طرح ہے عمیرؔ کہ اس کو جتنا بھی کوئی بڑھائے بڑھنے لگے

غزل · Ghazal

kahaa jo main ne ghalat kar rahi ho chun ke mujhe

کہا جو میں نے غلط کر رہی ہو چن کے مجھے اچانک اس نے کہا چپ یہ بات سن کے مجھے کوئی جنون ہوا میں اڑا دے میرا وجود کوئی عصا ہو جو روئی کی طرح دھنکے مجھے کسی نے کہہ کے جب اک ہاں بسایا دل کا جہاں قسم خدا کی سمجھ آئے معنی کن کے مجھے ادھیڑ دے گر ارادہ نہیں پہننے کا یہ کیا کہ ایک طرف رکھ دیا ہے بن کے مجھے تمھارے لوٹنے تک کچھ برا نہ ہو گیا ہو نہ پاس چھوڑنا مجھ ایسے بد شگن کے مجھے شجر سے کاٹ لیا ہے تو اپنی میز بنا اگر نہیں تو پھر آنے دے کام گھن کے مجھے کل ایک ریل کی چھک چھک سے رکن یاد آئے مفاعلن فعلاتن مفاعلن کے مجھے فقیر لوگ سمجھ آئیں یا نہ آئیں عمیرؔ کوئی سمجھتا نہیں ہے سوائے ان کے مجھے

غزل · Ghazal

musalsal mujassam du'aaein salaamat rahein

مسلسل مجسم دعائیں سلامت رہیں سلامت رہیں سب کی مائیں سلامت رہیں ہمارے بھی ہے آگے پیچھے کوئی کہہ سکیں یہ جو لوگ ہیں دائیں بائیں سلامت رہیں اگر ساتھ چلنا ہے آئیں جی خوش آمدید اگر جا رہے ہیں تو جائیں سلامت رہیں مرے گھر کے دروازے پر بھی ہوئیں دستکیں گلی سے گزرتی ہوائیں سلامت رہیں سلامت ہیں سب محفلیں ان کے ڈر کے طفیل یہ تنہائی جیسی بلائیں سلامت رہیں تجھے خامشی کا پتہ ہی نہیں ورنہ تو مرے ساتھ کہتا صدائیں سلامت رہیں وہ دل جو دھڑکتے ہیں پتھر نہیں ان کی خیر وہ آنکھیں جو آنسو بہائیں سلامت رہیں خود آتا تھا پہلے اور اس بار بس اک پیام جنم دن کی شبھکامنائیں سلامت رہیں مرا کیا ہے پہلے سے ٹوٹا ہوا ہوں عمیرؔ بس ان دوستوں کی انائیں سلامت رہیں

See all 44 Ghazals →

Similar Poets