apnaa jab bojh miri jaan uThaanaa paD jaae — Jamal Ehsani

"vo log mere bahut pyaar karne vaale the guzar gae hain jo mausam guzarne vaale the nai ruton mein dukhon ke bhi silsile hain nae vo zakhm taaza hue hain jo bharne vaale the ye kis maqaam pe sujhi tujhe bichhaDne ki ki ab to jaa ke kahin din sanvarne vaale the hazaar mujh se vo paimaan-e-vasl kartaa rahaa par us ke taur-tariqe mukarne vaale the tumhein to fakhr thaa shiraaza-bandi-e-jaan par hamaaraa kyaa hai ki ham to bikharne vaale the tamaam raat nahaayaa thaa shahr baarish mein vo rang utar hi gae jo utarne vaale the us ek chhoTe se qasbe pe rail Thahri nahin vahaan bhi chand musaafir utarne vaale the"

"mujh ko vo bhi basaa-ghanimat thaa us se jo rishta-e-shikaayat thaa ab ye 'uqda khulaa ki us ke liye main mohabbat nahin zarurat thaa tu ne ehsaas hi na hone diyaa jo bhi kuchh thaa tiri badaulat thaa mujh pe us chashm-e-tar ne sahl kiyaa varna ye 'ishq to musibat thaa main ne vo hijr bhi guzaara hai jab tiraa qurb bhi nihaayat thaa"

"nashe ki lahr taari ho rahi hai miri aavaaz bhaari ho rahi hai raqibon par 'inaayat barsar-e-bazm bahut khaatir hamaari ho rahi hai sabhi mere maraz ko koste hain ye kyaa timaar-daari ho rahi hai chaman kaa raasta mat gher ke baiTh khafaa baad-e-bahaari ho rahi hai sab apne apne ghar mein mutmain hain mujhe kyon be-qaraari ho rahi hai gali ke ek ghar mein 'iid ke roz ye kaisi aah-o-zaari ho rahi hai sunaa hai us gali se 'aashiqon ki nai fehrist jaari ho rahi hai jo aae puchhtaa hai 'umr meri 'ajab timaardaari ho rahi hai mire pahlu mein vo hai aur mujh par 'ajab vahshat si taari ho rahi hai"

"muddaton baa'd shab-e-maah use dekhaa thaa par kisi aur ke hamraah use dekhaa thaa kyaa khabar thi ki kahaani koi ban jaaegi main ne kal bazm mein naagaah use dekhaa thaa vasl ki raat sitaaron ne baDi hasrat se gaah dekhaa thaa mujhe gaah use dekhaa thaa log use DhunDhne nikle to ye maa'lum huaa jis ne dekhaa thaa sar-e-raah use dekhaa thaa aaj ik 'umr ke baa'd us se milaa thaa lekin apne ahvaal se aagaah use dekhaa thaa us kaa kyaa Thiik ki logon ne ba-yak-vaqt 'jamaal' sar-e-mai-khaana-o-dargaah use dekhaa thaa"

"raat aati rahti hai din nikaltaa rahtaa hai aur khudaa ke bandon kaa kaam chaltaa rahtaa hai phir rahaa huun basti mein ye pata liye kab se ik charaagh us ghar mein din ko jaltaa rahtaa hai ek ghar hai main jis mein rahtaa huun khush-o-khurram ek baat hai jis se dil dahaltaa rahtaa hai main bhi aasmaanon mein roz izaafa kartaa huun vo bhi in zaminon kaa rukh badaltaa rahtaa hai ziist ki tamaazat mein shaakh-e-marg se aage raah-rau Thahartaa hai rasta chaltaa rahtaa hai 'ishq karne vaalon ko sirf ye suhulat hai kuchh na karne se bhi kuchh dil bahaltaa rahtaa hai main bisaat-e-duniyaa ko jab lapeT detaa huun koi dusraa mujh mein ghar badaltaa rahtaa hai"

"is samay koi nahin meri nigahbaani par ye ghaDi sakht kaDi hai tire zindaani par baa-khabar kar ke rah-e-ishq ki mushkil se tujhe faisla chhoD diyaa hai tiri aasaani par na havaa aur na miTTi pe kabhi ho paayaa jo bharosaa hai mujhe bahte hue paani par main abhi pahle khasaare se nahin niklaa huun phir bhi tayyaar hai dil dusri naadaani par kisi bhi vaqt badal saktaa hai lamha koi is qadar khush bhi na ho meri pareshaani par khatm hone ko hain ashkon ke zakhire bhi 'jamaal' roe kab tak koi is shahr ki viraani par"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"