apne fan mein yaktaa huun — Arif Hasan Khan

"nai ghazlein likhun kis ke liye aur giit sajaaun kis ke liye miraa ham-dam mujh se ruuTh gayaa ab naghme gaaun kis ke liye vo paas jo thaa to us ke liye auron se bhi laDnaa paDtaa thaa ab kis ke liye main kis se laDun aur khud ko jalaaun kis ke liye ik us ke tabassum ki khaatir dukh-dard hazaaron sahtaa thaa ab kis ke liye dukh-dard sahun aur ashk bahaaun kis ke liye vo thaa to faqat us ki khaatir auron se bhi milnaa paDtaa thaa ab aise vaise logon ke main naaz uThaaun kis ke liye main us ke liye hi sanvartaa thaa aur khud ko sajaayaa kartaa thaa ab khud ko sanvaarun kis ke liye aur ghar ko sajaaun kis ke liye jab des mein koi apnaa thaa pardes mein kab ji lagtaa thaa ab kis ke liye ghar yaad aae aur des ko jaaun kis ke liye us kaa nahin 'aarif' koi badal aisaa hai vo meraa jaan-e-ghazal ab us ke sivaa kyaa yaad rakhun aur us ko bhulaaun kis ke liye"

"vo to meraa apnaa thaa jis ne mujh ko luuTaa thaa maut pe meri rotaa thaa meraa qaatil bholaa thaa sab jag suunaa suunaa thaa jab main tujh se bichhDaa thaa dhund si chhaai thi har-su kal kaa suraj kaisaa thaa koi birhan gaati thi dard bharaa ik naghma thaa Dartaa Dartaa saa mujh se meraa apnaa saaya thaa main barfaani raaton mein hijr ki aag mein jaltaa thaa raah-e-vafaa mein pair na rakh ik divaana kahtaa thaa insaanon ke jangal mein 'aarif' bilkul tanhaa thaa"

"main huun aur meraa kamra hai raat kaa gahraa sannaaTaa hai lab par hain insaaf ki baatein dil mein adaavat kaa jazba hai kuchh to bataa kyaa baat hai aakhir kyuun itnaa khaamosh khaDaa hai dil mein khalish rahti hai aksar teraa meraa kyaa rishta hai kis ko sunaaein kaun sunegaa dard bharaa apnaa qissa hai aankh khuli to ham ne jaanaa pyaar mohabbat ik sapnaa hai dekh liyaa sansaar ko 'aarif' tu hi jag mein sab se buraa hai"

"kam nahin ye bhi zindagi ke liye jaan jaae tiri khushi ke liye dosti ho vafaa ho nafrat ho kuchh bahaana ho zindagi ke liye aap ki yaad kaa bas ek diyaa hai bahut dil ki raushni ke liye vo jo maange to jaan bhi de duun ji rahaa huun isi khushi ke liye baarhaa khuun kar liyaa dil ko us ke honTon ki ik hansi ke liye aaj ke daur mein suno 'aarif' koi martaa nahin kisi ke liye"

"kisi kaa yuun to huaa kaun umr-bhar phir bhi na jaane kyuun thaa yaqin tere pyaar par phir bhi hazaar baar mire dil ko us ne Thukraayaa mujhe hai us se umid-e-vafaa magar phir bhi tumhaare naqsh-e-qadam par gayaa main sar-ba-sujud kisi ke aage jhukaayaa na thaa ye sar phir bhi main us ki chaah mein donon jahaan chhoD chalaa vo bevafaa na miraa ho sakaa magar phir bhi tumhaari bazm se nikle to phir mili na amaan bhaTakte phirte rahe garche dar-ba-dar phir bhi na tu hi tu vo rahaa aur na main hi main vo rahaa hai naqsh naam tiraa mere qalb par phir bhi main apni jaan bhi us par luTaa ke dekh chukaa use aziiz rahaa mujh se maal-o-zar phir bhi main tujh ko chhoD ke sar phoDne kahaan jaaun mire nasib mein hai teraa sang-e-dar phir bhi banaa sake na tire dil mein apnaa ghar 'aarif' luTaa diyaa tiri chaahat mein apnaa ghar phir bhi"

"tu bevafaa hi sahi tujh se pyaar aaj bhi hai tire liye ye dil-o-jaan nisaar aaj bhi hai main jaantaa huun na aaegaa tu palaT ke kabhi magar mujhe to tiraa intizaar aaj bhi hai tu laakh ghair sahi aaj-kal tu thaa meraa dil-o-jigar pe tiraa ikhtiyaar aaj bhi hai tire baghair bhi duniyaa bahut hasin hai magar tire firaaq mein dil be-qaraar aaj bhi hai khushi hai mujh ko tujhe mil gai tiri manzil khushi se aankh miri ashk-baar aaj bhi hai na bhar sakegaa kabhi us ko vaqt kaa marham tire karam se miraa dil figaar aaj bhi hai main tere baagh kaa barg-e-khizaan-rasida huun tu vo kali hai ki jis par bahaar aaj bhi hai bichhaD ke tujh se jiye jaa rahaa hai kyuun 'aarif' jigar mein ye khalish-e-nok-e-khaar aaj bhi hai"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"