apne maa'sum gunaahon ki sazaa kyaa maangein — Charan Singh Bashar

"ai sar-phiri havaa tujhe is ki khabar bhi hai tu jis taraf chali hai udhar meraa ghar bhi hai dastaar mujh se maangne vaale nazar uThaa dastaar hi nahin mire shaane pe sar bhi hai zaahir mein Thik-Thaak hai har ek aadmi andaaz-e-guftugu mein bikharne kaa Dar bhi hai teri hi khushbuon se mahakti hai rahguzar teri taraf safar bhi tu hi ham-safar bhi hai duniyaa tiri 'ajib hai mere khudaa jahaan jiine ki aarzu bhi hai marne kaa Dar bhi hai allaah se 'bashar' nahin chhuptaa kisi kaa haal kyaa hai hamaare dil mein use ye khabar bhi hai"

"kisi gum-karda-e-manzil ne hi pahre pe rakkhi hai vo ik zinda lahu ki buund jo kaanTe pe rakkhi hai jo qaatil hain vo sab mahfuz hain apne Thikaanon mein magar ik be-sahaaraa laash chauraahe pe rakkhi hai mire zakhmon ko marham ki tamanna tum se kyaa hogi ki tum ne pyaar ki buniyaad hi badle mein rakkhi hai gharon ki aag ham se bujh nahin sakti magar khush hain ki ham ne saari zimmedaari hamsaae pe rakkhi hai"

"main andheraa ek shab kaa tiraa sham' saa zamaana bhalaa kaise hogaa mumkin koi mil ke ghar basaanaa abhi aag se lipaTne kaa hunar hai mujh mein zinda abhi gardish-e-zamaana mire saamne na aanaa jahaan be-zamir andheron ne kiyaa hai khair-maqdam usi raah par charaaghon ko jalaa ke chhoD jaanaa miraa dil hai muztarib saa tiraa dil hai mutmain saa na tiraa yahaan Thikaanaa na miraa yahaan Thikaanaa main safar pe lauT jaane kaa iraada jab karun huun koi ai 'bashar' kahe hai mire shahr se na jaanaa"

"kab tak rahegaa shab kaa safar dekhnaa ye hai hai kitni duur aur sahar dekhnaa ye hai har ik qadam pe vaqt badal jaae hai yahaan kis tarh tai karoge safar dekhnaa ye hai buDhaa darakht tez havaaon ke saamne kab tak rahegaa sina-sipar dekhnaa ye hai honTon pe khil rahe hain sadaaqat ke chand phuul neze pe kab buland ho sar dekhnaa ye hai dange mein to halaak hue be-shumaar log kal kis tarah chhapegi khabar dekhnaa ye hai insaaniyat ke naam pe kab tak laDeinge ham kab tak bahegaa khun-e-'bashar' dekhnaa ye hai"

"hamin jaise binaa patvaar dariyaa paar karte hain vo kyaa maujon se Takraaeinge jo paani se Darte hain unhin ko ai vatan kyon haashiye pe rakkhaa jaataa hai tiri surat mein jo khun-e-jigar se rang bharte hain agar zinda hi rahnaa hai to rahiye apni sharton par ki khuddaari se khaali log sau sau baar marte hain ghanimat hai bachaa rakkhaa hai ham ne rang-o-khushbu ko ki ham vo phuul hain jo roz sho'lon se guzarte hain 'bashar' sach bolne vaalon ko koi kyaa Daraaegaa jo Darte hain khudaa se vo kahaan duniyaa se Darte hain"

"fazaa-e-aadmiyyat ko sanvarne hi nahin dete siyaasat-daan dilon ke zakhm bharne hi nahin dete zamaana vo bhi thaa jab haadse kaa Dar sataataa thaa magar ab haadse logon ko Darne hi nahin dete kuchh ham ne khvaab aise paal rakkhe hain ki jo ham ko haqiqat ki zamin par paanv rakhne hi nahin dete ye maanaa 'ishq se banti hai jannat zindagi lekin masaail zindagi se 'ishq karne hi nahin dete guzargaahon ke aage manzilein aavaaz deti hain magar Thahre hue lamhe guzarne hi nahin dete 'bashar' be-rahm hain ye parbaton jaise usuul apne kisi ke dil ki vaadi mein utarne hi nahin dete"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"hai jo ik maa'raka faisal nahin hone detaa jin vo ho ke mujhe botal nahin hone detaa qatl ik roz hi kartaa huun isi goshe mein aur saabit ise maqtal nahin hone detaa zid hai us ki ki har ik shaakh ho phir sabz hi sabz garche paidaa koi konpal nahin hone detaa raushni apne khayaalon hi se karni hogi koi raushan kahin mash'al nahin hone detaa chun-ki miTTi ki bhi ek apni alag khushbu hai main kahin bhi ise sandal nahin hone detaa ik parinda ki jo sahtaa hai havaaon kaa dabaao aur parvaaz ko paidal nahin hone detaa Dar hai us ko nazar aae na kahin zehn kaa 'aks vo miraa aaina saiqal nahin hone detaa tiraa qaanun hai jangal kaa ghanimat hai ki tu mire is shahr ko jangal nahin hone detaa chalo baat us ki sunein ek 'ajab mantiq se jo kisi baat ko muhmal nahin hone detaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"