baagh-e-adan ke khilte gulaabon ke saath thaa — Abdul Matin Jami

"naghmon ke qaafile kaa main tanhaa naqib thaa yaa shaakh-e-kaaenaat pe ik andalib thaa apnaa koi rafiq na koi raqib thaa main khvaahishon ki bazm mein sab ke qarib thaa ziine pe qasr-e-vaqt ke chaDhtaa chalaa gayaa meraa shikasta hausla jo khush-nasib thaa us ke badan se lipTi hui thi lahu ki shaakh vo shakhs jo ki shahr-e-anaa kaa khatib thaa thiin aasmaan ki vusatein apni nigaah mein lamhaat-e-gum-shuda kaa tasavvur ajiib thaa girdaab-e-haadsaat mein ham phans ke rah gae jab saahil-e-muraad bahut hi qarib thaa logon se mil rahi thi use raushni ki bhiik dil ke hasin dayaar mein 'jaami' gharib thaa"

"jab andhere ke bayaabaan se guzar jaaegaa naa-tavaan jism ke saae se vo Dar jaaegaa gar khayaalaat kaa shiraaza bikhar jaaegaa aadmi apni hadon se bhi guzar jaaegaa karb ki dhuup ki garmi se pareshaan ho kar vo miri ruuh ke dariyaa mein utar jaaegaa hai thakaa-haaraa bahut vaqt kaa buDhaa suraj chalte-chalte kisi saae mein Thahar jaaegaa uub kar ghar ki ghuTan se to nikal aaya hai ab bhaTaktaa huaa jaane vo kidhar jaaegaa apne afkaar ki bhikon se hi 'jaami' shaayad mere alfaaz ke kashkol ko bhar jaaegaa"

"dard kaa shahr hai armaan ki baatein kar lein saare raunde hue insaan ki baatein kar lein gham-o-aalaam ki likkhi hai kahaani ham ne bazm-e-ahbaab mein unvaan ki baatein kar lein khud-gharaz logon mein haatim ko kahaan DhunDein ham ku-e-iflaas mein imkaan ki baatein kar lein naf-o-nuqsaan se sarokaar nahin hai ham ko khaadim-e-khalq hain ehsaan ki baatein kar lein munsif-e-vaqt agar kho gayaa taariki mein taaron ki chhaanv mein mizaan ki baatein kar lein aaj mahfil mein chale aae hain 'jaami' kaise un se ham vaqt ke bohraan ki baatein kar lein"

"har koi Duubaa huaa thaa saazishon ki jhiil mein zehn ki kashti thi apni hairaton ki jhiil mein aasmaan par uDte uDte lahr khaa kar gir paDaa aarzu kaa ik parinda haadson ki jhiil mein ab idhar aati nahin hain khvaahishon ki hirniyaan yaad ki daldal bahut hai uljhanon ki jhiil mein phir uchhaale kis ne aavaazon ke kankar arsh par jab mukammal khaamushi thi saaaton ki jhiil mein azmaton ki kuchh sunahri machhliyaan paidaa huiin raushni ke ujle ujle tazkaron ki jhiil mein yaas-o-hasrat kaa sahifa hai hamaari zindagi ham nahaate hain muqaddas aayaton ki jhiil mein vaadi-e-hasrat mein 'jaami' haadisa aisaa huaa karb kaa tufaan uTThaa qahqahon ki jhiil mein"

"zehn ke baagh mein khaDaa huun main zakhm ke phuul baanTtaa huun main gumbad-e-vaqt par chaDhaa huun main khud ko aavaaz de rahaa huun main nai tahzib ki ziyaa huun main apne saae se Dar gayaa huun main ziist ke khet se akelaa hi dard ki fasl kaaTtaa huun main yaad rakkhegaa koi kyon mujh ko ek jangal kaa raasta huun main mal ke vahshat ki raakh chehre par shahr mein apne ghumtaa huun main mujh ko apnaa lo main tumhaaraa huun raah-e-ulfat kaa haadisa huun main"

"aag ke sahraa mein apnaa lamha lamha zard thaa baad-e-vahshat chal rahi thi chehra chehra zard thaa aa gayaa thaa raushni ke daaere mein jab shigaaf aagahi ki saltanat mein saaya saaya zard thaa ik sahifa thaa ba-unvaan-e-vafaadaari magar safhe safhe par thi surkhi nuqta nuqta zard thaa har koi thaa haadson ki tez aandhi kaa asiir yaas kaa thaa daur-daura chehra chehra zard thaa har tanaffus thaa baqaa ki kashmakash mein mubtalaa vaahimon ki sarzamin kaa khitta khitta zard thaa is qadar viraaniyon ko saath laai thi bahaar peD kaa chehra luTaa thaa pattaa pattaa zard thaa"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"nahin piitaa main par navaazish hui hai baDi mausamon ki sifaarish hui hai bahut din se sahraa ke jaisaa ye dil hai na baadal ghire hain na baarish hui hai yahaan hai bulandi jo kirdaar ki to vahaan khaal-o-khad ki numaaish hui hai tiri jhiil jaisi jo dekhi hain aankhein miri Duub jaane ki khvaahish hui hai chhalaktaa nahin khuun zakhmon se aise kahin naakhunon ki bhi kaavish hui hai hamein 'ishq mein mubtalaa kar rahe hain nazar aur dil mein ye saazish hui hai vahaan dushmanon ki baDi yaad aai jahaan doston ki navaazish hui hai vafaa-daariyon kaa sila mil rahaa hai hamaari sadaa aazmaaish hui hai pareshaaniyon mein jo ham mubtalaa hain yaqinan koi ham se laghzish hui hai vahin apni aankhon ko ham chhoD aae jahaan manzaron ki numaaish hui hai raqibon ko hai chhuT mahfil mein un ki mire aane jaane pe bandish hui hai ghazal kahnaa 'faaruq' main chhoD dungaa isi baat par un se ranjish hui hai"

"jab se aayaa huun tere gaanv mein rang hi rang hain fazaaon mein aa ki dukh sukh ki koi baat karein baiTh kar shishamon ki chhaanv mein main bhi kartaa huun zabt ki koshish to bhi takhfif kar adaaon mein vo tiraa dafatan bichhaD jaanaa vo miraa dekhnaa khalaaon mein ho agar koi gosh-bar-aavaaz ik khamoshi bhi hai sadaaon mein yahi mere liye ghanimat hai saans le luun khuli fazaaon mein"

"bas ki ik lams ki ummid pe vaare hue hain so tire saamne ye khaak pasaare hue hain jaane kab un ko bujhaa baiThe koi baad-e-alam sar-e-mizhgaan-e-tamannaa jo sitaare hue hain zindagi tu bhi hamein vaise hi ik roz guzaar jis tarah ham tujhe barson se guzaare hue hain nit-nae naqsh karein us pe aziyyat ke raqam aa ki ham takhti-e-dil apni pachaare hue hain kab kuchal jaaein kisi paanv se ham barg-e-vajud vaqt ki dhuup mein vaise hi karaare hue hain jaante hain ki tu hi ishq-badan ko hai libaas ham tiraa ruup jo aashuftagi dhaare hue hain apni jurat ki sataaish ho ki ham chob-mizaaj rabt rakhte hain sadaa un se jo aare hue hain"

"phir bahaar aai hai phir josh mein saudaa hogaa zakhm-e-derinaa se phir khuun Tapaktaa hogaa biiti baaton ke vo naasur hare phir honge baat niklegi to phir baat ko rakhnaa hogaa yurishein kar ke umanD aaeingi suuni shaamein laakh bhaTkein kisi unvaan na saveraa hogaa ji ko samjhaaeinge matvaali havaa ke jhonke phir koi laakh sambhaale na sambhalnaa hogaa kaisi rut aai havaa chalti hai ji Doltaa hai ab to hansnaa bhi taDapne kaa bahaanaa hogaa TuuT jaaegaa ye laachaari-e-daaem kaa fusun aur is tarah ki jaise koi aataa hogaa dil dhaDakne ki sadaa aaegi sune-pan mein duur baadal kahin parbat pe garajtaa hogaa"