bachpan hai ek khvaab javaani fareb hai — Ahmad Kamal Hashmi

"chaukhaT pe ki raste pe rakho meri balaa se meraa vo diyaa hai nahin Dartaa jo havaa se ye jurm-e-mohabbat main ne daanista kiyaa hai duniyaa se kaho mujh ko Daraae na sazaa se ye mere sitamgar kaa karam kam to nahin hai main aah jo bhartaa huun to detaa hai dilaase is shahr mein baste hain jo bahre hain ki murde ab dar nahin khultaa hai koi aah-o-bukaa se kuchh logon ne mil-jul ke kuaan khod liyaa hai kuchh log abhi minnatein karte hain ghaTaa se dariyaa ki sakhaavat kaa bharam khulne lagaa hai kuchh log hain sairaab to kuchh log hain pyaase bimaar ne is baar yahi qasd kiyaa hai vo Thiik nahin hogaa davaa se na du'aa se"

"har aadmi ne ruup hai dhaaraa faqir kaa gardish mein aa gayaa ye sitaaraa faqir kaa duniyaa pe dil hamaaraa kabhi aataa hi nahin hai dosto mizaaj hamaaraa faqir kaa utran pahan ke shaah ki khush hain musaahibin khush hai vo khud pahan ke utaaraa faqir kaa darvaaze par khamosh khaDaa huun main der se kuchh to karo khayaal khudaaraa faqir kaa darbaar mein bulaayaa thaa us ko amiir ne us ko milaa javaab karaaraa faqir kaa bas ik jhalak hi paa ke tiri khush bahut hai dil thoDe mein ho rahaa hai guzaaraa faqir kaa duniyaa paDi hui hai 'kamaal' us mein dekhiye kone mein jo paDaa hai piTaaraa faqir kaa"

"kisi ne pahle shikaayat ki intihaa kar di phir us ke baa'd mohabbat ki intihaa kar di tumhaare baare mein jab sochne main baiThaa to dimaagh-o-dil ne 'adaavat ki intihaa kar di main apne aap ko taqsim kar ke lauTaa huun lo aaj main ne sakhaavat ki intihaa kar di vo saj sanvar ke kuchh itnaa hasin lagne lagaa ki aainon ne bhi hairat ki intihaa kar di havaa chali to lavein sab ne tez-tar kar liin diyon ne ab ke jasaarat ki intihaa kar di sakhaavaton ke ghalat faaede uThaae gae zaruraton ne zarurat ki intihaa kar di main us ke vaa'de pe phir e'tibaar kar baiThaa 'kamaal' main ne himaaqat ki intihaa kar di"

"vo mere baare mein jo kuchh bataa rahaa thaa mujhe ghalat thaa phir bhi yaqin us pe aa rahaa thaa mujhe tang aa ke us ne mujhe TuuTaa phuTaa chhoD diyaa ba-sad-khulus kabhi jo banaa rahaa thaa mujhe amir-e-shahr ne masnad ki peshkash ki thi shikaari jaal mein apne phansaa rahaa thaa mujhe phir us ke baa'd bahut ghus ke phaT gayaa kaaghaz ragaD ragaD ke rubber vo miTaa rahaa thaa mujhe main khush nahin thaa magar khush dikhaai detaa thaa koi latife sunaa kar hansaa rahaa thaa mujhe na jaane kyon main use bhulne ki zid par thaa na jaane kyon vo bahut yaad aa rahaa thaa mujhe mire raqib se vo mahv-e-guftugu thaa 'kamaal' vo us kaa dost nahin thaa sataa rahaa thaa mujhe"

"sochaa kabhi nahin thaa ki aisaa kareinge khvaab aankhon se meri niind kaa saudaa kareinge khvaab hai TuTnaa nasib to TuuTaa kareinge khvaab ham to har ek haal mein dekhaa kareinge khvaab dekho zarur khvaahish-e-taa’bir mat karo halkaan tum ko aur ziyaada kareinge khvaab dil ko bahut 'aziz hai ye kaarobaar-e-shauq ham to hamesha bechaa kharidaa kareinge khvaab ye soch kar hi main ne lagaae hain ye darakht phal dein na dein pa dhuup mein saaya kareinge khvaab jin ko hai khvaab dekhne ki lat lagi hui aankhein khuli bhi hon to vo dekhaa kareinge khvaab aankhon mein khaamushi se basaayaa to thaa magar sochaa na thaa ki shor machaayaa kareinge khvaab aaegi gahri niind 'kamaal' aap ko tabhi jab aap apni aankhon se minhaa kareinge khvaab"

"kah chukaa huun main kai baar nahin maantaa main ai sitamgar tujhe sardaar nahin maantaa main hai agar 'ishq to khul kar kabhi izhaar bhi kar teri khaamoshi ko iqraar nahin maantaa main aankhon mein jazb mujhe karni hai surat teri ik jhalak ko tiraa didaar nahin maantaa main qadr-o-qimat mire dil ki tu samajh hi na sakaa jaa tujhe achchhaa kharidaar nahin maantaa main tu abhi qais hai majnun nahin ban paayaa hai tujh ko lailaa kaa talabgaar nahin maantaa main sar ko Takraane ki jurat ho to dar bantaa hai kisi divaar ko divaar nahin maantaa main khaak bhi chaahiye sahraa mein uDaane ke liye kisi bhi chiiz ko bekaar nahin maantaa main jo kabhi myaan se baahar nahin aati hai 'kamaal' aisi talvaar ko talvaar nahin maantaa main"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"shab ki taarik raahdaari hai aur miraa khauf iztiraari hai sabz khvaabon ki kam se kam qimat zindagi bhar ki ashk-baari hai ik musallat-shuda tamaddun ko ye na kahiye ki ikhtiyaari hai shash-jihaati mushaahida hai miyaan tajrabon ki sanad pe bhaari hai shukriya aap ki mohabbat kaa dil kaa maqsum sogvaari hai tajziye sun ke muskuraa denaa apni itni hi zimmedaari hai"

"ye hai mai-kada yahaan rind hain yahaan sab kaa saaqi imaam hai ye haram nahin hai ai shaikh ji yahaan paarsaai haraam hai jo zaraa si pi ke bahak gayaa use mai-kade se nikaal do yahaan tang-nazar kaa guzar nahin yahaan ahl-e-zarf kaa kaam hai koi mast hai koi tishna-lab to kisi ke haath mein jaam hai magar is pe koi kare bhi kyaa ye to mai-kade kaa nizaam hai ye janaab-e-shaikh kaa falsafa hai 'ajib saare jahaan se jo vahaan piyo to halaal hai jo yahaan piyo to haraam hai tujhe apne husn kaa vaasta mere shauq-e-did pa rahm khaa zaraa muskuraa ke naqaab uThaa ki nazar ko shauq-e-salaam hai na sunnaa to huur o qusur ki ye hikaayatein mujhe vaa'izaa koi baat kar dar-e-yaar ki dar-e-yaar hi se to kaam hai na to e'tikaaf se kuchh gharaz na savaab-o-zuhd se vaasta tiri diid aisi namaaz hai na sujud hai na qayaam hai ye durust ki 'aib hai mai-kashi ye ba-jaa ki baada haraam hai magar ab savaal ye aa paDaa ki tumhaare haath mein jaam hai jo uThi to subh-e-davaam thi jo jhuki to shaam hi shaam thi tiri chashm-e-mast mein saaqiyaa miri zindagi kaa nizaam hai miraa farz hai ki paDaa rahun tiri baargaah mein saaqiyaa koi tishna-lab hai ki sair hai yahi dekhnaa tiraa kaam hai isi kaaenaat mein ai 'jigar' koi inqalaab uThegaa phir ki buland ho ke bhi aadmi abhi khvaahishon kaa ghulaam hai"