bahaa kar khuun meraa mujh se bole — Jaleel Manikpuri

"dil hai apnaa na ab jigar apnaa kar gai kaam vo nazar apnaa ab to donon ki ek haalat hai dil sambhaalun ki main jigar apnaa main huun go be-khabar zamaane se dil hai pahlu mein baa-khabar apnaa dil mein aae the sair karne ko rah paDe vo samajh ke ghar apnaa thaa baDaa maarka mohabbat kaa sar kiyaa main ne de ke sar apnaa ashk-baari nahin ye dar-parda haal kahti hai chashm-e-tar apnaa kyaa asar thaa nigaah-e-saaqi mein nashsha utraa na umr bhar apnaa chaara-gar de mujhe davaa aisi dard ho jaae chaara-gar apnaa vaza-daari ki shaan hai ye 'jalil' rang badlaa na umr bhar apnaa"

"kho ke dil meraa tumhein naa-haq pashemaani hui tum se naadaani hui yaa mujh se naadaani hui allaah allaah phuuT niklaa rang chaahat kaa miri zahr khaayaa main ne poshaak aap ki dhaani hui ham ko ho saktaa nahin dhokaa hujum-e-hashr mein teri surat hai azal se jaani-pahchaani hui ai sabaa main aur kyaa duun qabr-e-majnun ke liye khaak thoDi si chaDhaa denaa miri chhaani hui yaar ke haathon huaa jo kuchh huaa ai tegh-e-naaz teri uryaani hui yaa meri qurbaani hui kar gai divaangi ham ko bari har jurm se chaak-daamaani se apni chaak-daamaani hui baaDh di baanki adaaon ne jo khanjar ko 'jalil' zabh karne mein mire qaatil ko aasaani hui"

"bu-e-mai paa ke main chaltaa huaa mai-khaane ko ik pari thi ki lagaa le gai divaane ko mere saaqi saa kahaan koi pilaane vaalaa aankhein kahti hain luTaa dijiye mai-khaane ko sakhti-e-ishq uThaane kaa zamaana na rahaa ab to hai phuul bhi pathar tire divaane ko haath mein aate hi kyaa paanv nikaale saaqi aafrin hai tire chalte hue paimaane ko is mein ai ahl-e-vatan raae tumhaari kyaa hai kahti hai vahshat-e-dil ghar se nikal jaane ko chal gayaa kaam yahaan jaam chale yaa na chale baada-kash lauT gae dekh kai mai-khaane ko dil sulagte rahein parvaa nahin hoti kuchh unhein shama achchhi ki jalaa deti hai parvaane ko shaamil-e-daur hon aghyaar sitam hai saaqi apne paimaane se baDhne de na paimaane ko Husn-e-khidmat kaa sila dekhiye yuun paate hain rukh milaa aaine ko zulf mili shaane ko chaal hai mast nazar mast adaa mein masti jaise aate hain vo TuuTe hoe mai-khaane ko abr mein barq kaa rah rah ke chamaknaa kaisaa ye bhi ik us ki hai shokhi mire taDpaane ko is mein ai parda-nashin parda-dari kis ki hai dekhne aati hai khilqat tire divaane ko khuub insaaf hai ai baada-kasho kyaa kahnaa tum ko taskin ho gardish ho jo paimaane ko hai baDi chiiz lagi dil ki khudaa jas ko de aag mein kuud paDaa dekhiye parvaane ko ho ke paaband-e-junun sab se rihaai paai beDiyaan lipTi thiin laakhon tire divaane ko khinch chuki tegh to ab hai ye rukaavaT kaisi aap taDpaane ko aae hain ki tarsaane ko koi aisi bhi hai surat tire sadqe saaqi rakh luun main dil mein uThaa kar tire mai-khaane ko but-e-pindaar ko toDo to ho dil paak 'jalil' tum khudaa-khaana banaao isi but-khaane ko"

"ghaTaa diyaa rutba har hasin kaa miTaa diyaa rang hur-e-in kaa nahin hai ye chaand chaudhvin kaa shabaab kaa mere mah-jabin kaa ye raat hai vasl ki miri jaan bhare hain dil mein hazaaron armaan nahin na nikle zabaan se haan haan are ye mauqaa nahin nahin kaa tabaah vahshat mein huun main dar dar abhi bigaD jaae ye banaa ghar jo dil mein rakkhun tujhe sitamgar to dil na rakkhe mujhe kahin kaa na qatl se mere haath khincho lahu bahaa kar bahaar dekho paDegi uD kar jo chhinT is ki banegi vo phuul aastin kaa sitam thaa bachpan kaa vo zamaana ghazab vo dil kaa pasand aataa vo god mein meri loT jaanaa machal machal kar kisi hasin kaa tumhin se ru-e-zamin moattar tumhin se sath-e-falak munavvar tumhin to ho phuul yaasmin kaa tumhin to ho chaand chaudhvin kaa udhar sabaa ne ye gul khilaayaa chaman mein kaliyon ko gudgudaayaa idhar hansi ne sitam ye Dhaayaa ki munh liyaa chuum us hasin kaa ye raat itni jo baDh gai hai siyaahi itni jo chaDh gai hai kahin khulaa hai zarur joDaa kisi ke gesu-e-ambarin kaa jo ghair se yaar tu milaa hai to dekh kaisaa Dubo rahaa hai tujhe mire aansuon kaa dariyaa mujhe pasina tiri jabin kaa na bahr jaari sahaab se hai na chaah labrez aab se hai vo daaman-e-tar kaa ik laqab hai ye naam hai meri aastin kaa jo dekh le us ki surat insaan agar ho kaafir to laae imaan jamaal kyaa hai but-e-hasin kaa kamaal hai surat-aafrin kaa na shauq-e-nazzaara mujh se puchho ye kah ke sotaa huun roz shab ko uThun jo main subh ko ilaahi to munh dikhaanaa kisi hasin kaa kuchh aisi ki main ne jabha-saai ki miT gai bakht ki buraai milaa jo us dar se daagh-e-sajda sitaara chamkaa miri jabin kaa zabaan se ho shukr adaa kahaan tak baDaa hi thaa dil-navaaz naavak kuchh is adaa se jigar pe baiThaa maza milaa yaar-e-ham-nashin kaa phiraa adam se na koi hamdam ki haal yaaron kaa puchhte ham ajiib dilchasp hai do-aalam ki jo gayaa ho gayaa vahin kaa araq araq hai jo ru-e-gul-gun ye khuub mauqaa hai ab na chaukun main sarnavisht apni dho hi Daalun pasina le kar tiri jabin kaa 'jalil' kyaa baat is sukhan ki ghazal mein hai taazgi chaman ki jo sher hai shaakh nastaran ki jo lafz hai phuul yaasmin kaa"

"baiTh jaa kar sar-e-mimbar vaaiz ho gayaa tu to mire sar vaaiz mai to jaaez nahin ye jaaez hai roz khaataa hai miraa sar vaaiz band kartaa hai dar-e-tauba kyuun khol kar vaaz kaa daftar vaaiz vaaizon ki main karun kyaa taarif ghar mein mai-khvaar hain baahar vaaiz mai-kashon hi ke liye hai ye baat jo hai dil mein vahi lab par vaaiz dekh kis rang se uTThi hai ghaTaa tah kar ab vaaz kaa daftar vaaiz kis tarah piite hain piine vaale dekh lenaa lab-e-kausar vaaiz maut bhi aati hai to hiile se aa gayaa rindon mein kyunkar vaaiz sakhtiyaan rindon pe karte karte aql par paD gae patthar vaaiz aatish-e-tar kaa jo paD jaae maza phunk de vaaz kaa daftar vaaiz rind aape se jo baahar hain to hon tu na ho jaame se baahar vaaiz shisha-e-dil kaa khudaa haafiz hai teri har baat hai patthar vaaiz zikr-e-mai vaaz mein jab aataa hai jhumtaa hai sar-e-mimbar vaaiz le ke aankhon se lagaataa saaghar paDh jo letaa khat-e-saaghar vaaiz mahfil-e-vaaz mein kyuun jaaun 'jalil' hain mujhe shisha-o-saaghar vaaiz"

"haae dam bhar bhi dil Thahar na sakaa haath siine pe koi dhar na sakaa aaina kis se dekhaa jaataa hai rashk ke maare vo sanvar na sakaa rah gayaa aankh mein nazaakat se dil mein naqsha tiraa utar na sakaa is jahaan se guzar gae laakhon us gali se koi guzar na sakaa mai-kashi se najaat mushkil hai mai kaa Duubaa kabhi ubhar na sakaa meraa naama khat-e-muqaddar thaa ki nazar se tiri guzar na sakaa jo tire ishq mein tabaah huaa koi us ko tabaah kar na sakaa aag aisi lagi thi siine mein aankh se dil mein vo utar na sakaa mausam-e-gul mein bhi 'jalil' afsos daaman apnaa gulon se bhar na sakaa"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"khel duniyaa-e-'aarzi kaa huun ek kirdaar zindagi kaa huun mujh ko rakkhaa gayaa andhere mein main bhi haqdaar raushni kaa huun intihaa ke qarib hai duniyaa aadmi aakhiri sadi kaa huun dil ko ehsaas ho gayaa teraa mo'tarif teri dosti kaa huun main ne ghurbat mein 'ilm sikhaa hai main to maqruz muflisi kaa huun pur na hogaa jo mere baa'd kabhi ek aisaa khalaa kami kaa huun meraa dushman nahin 'khayaali' koi dost bhi main kisi kisi kaa huun"

"nahin piitaa main par navaazish hui hai baDi mausamon ki sifaarish hui hai bahut din se sahraa ke jaisaa ye dil hai na baadal ghire hain na baarish hui hai yahaan hai bulandi jo kirdaar ki to vahaan khaal-o-khad ki numaaish hui hai tiri jhiil jaisi jo dekhi hain aankhein miri Duub jaane ki khvaahish hui hai chhalaktaa nahin khuun zakhmon se aise kahin naakhunon ki bhi kaavish hui hai hamein 'ishq mein mubtalaa kar rahe hain nazar aur dil mein ye saazish hui hai vahaan dushmanon ki baDi yaad aai jahaan doston ki navaazish hui hai vafaa-daariyon kaa sila mil rahaa hai hamaari sadaa aazmaaish hui hai pareshaaniyon mein jo ham mubtalaa hain yaqinan koi ham se laghzish hui hai vahin apni aankhon ko ham chhoD aae jahaan manzaron ki numaaish hui hai raqibon ko hai chhuT mahfil mein un ki mire aane jaane pe bandish hui hai ghazal kahnaa 'faaruq' main chhoD dungaa isi baat par un se ranjish hui hai"

"jab se aayaa huun tere gaanv mein rang hi rang hain fazaaon mein aa ki dukh sukh ki koi baat karein baiTh kar shishamon ki chhaanv mein main bhi kartaa huun zabt ki koshish to bhi takhfif kar adaaon mein vo tiraa dafatan bichhaD jaanaa vo miraa dekhnaa khalaaon mein ho agar koi gosh-bar-aavaaz ik khamoshi bhi hai sadaaon mein yahi mere liye ghanimat hai saans le luun khuli fazaaon mein"

"bas ki ik lams ki ummid pe vaare hue hain so tire saamne ye khaak pasaare hue hain jaane kab un ko bujhaa baiThe koi baad-e-alam sar-e-mizhgaan-e-tamannaa jo sitaare hue hain zindagi tu bhi hamein vaise hi ik roz guzaar jis tarah ham tujhe barson se guzaare hue hain nit-nae naqsh karein us pe aziyyat ke raqam aa ki ham takhti-e-dil apni pachaare hue hain kab kuchal jaaein kisi paanv se ham barg-e-vajud vaqt ki dhuup mein vaise hi karaare hue hain jaante hain ki tu hi ishq-badan ko hai libaas ham tiraa ruup jo aashuftagi dhaare hue hain apni jurat ki sataaish ho ki ham chob-mizaaj rabt rakhte hain sadaa un se jo aare hue hain"