"dar-e-imkaan khulaa hai mujh mein paanv khushbu kaa paDaa hai mujh mein khatm hotaa hi nahin meraa safar koi thak-haar gayaa hai mujh mein phuul hi phuul nazar aate hain shauq zanjir huaa hai mujh mein apni har saans garaan hai mujh ko jab se baazaar lagaa hai mujh mein roz-e-avval se andhere mein huun chaand kyon chikh rahaa hai mujh mein apne andar main sameTun kyaa kyaa saaraa ghar bikhraa paDaa hai mujh mein ik nai jang laDaa huun khud se der tak khuun bahaa hai mujh mein"
"dar-o-divaar par sabza nahin hai vagarna aur ghar mein kyaa nahin hai vafaa vaale kahaan ghota lagaaein ta'alluq koi bhi gahraa nahin hai vo jis mausam mein hotaa thaa numu main kisi bhi samt se lauTaa nahin hai 'ajab gum-gashtagi mein ji rahaa huun badan to hai magar chehra nahin hai bahut hi kaam ki hai raaegaani kisi ne Thiik se bartaa nahin hai"
Balwan Singh Azar"ai havaa ye charaagh kis ke hain itne raushan dimaagh kis ke hain mast-kun khushbuein mahakti hain dil mein sarsabz baagh kis ke hain pi rahaa huun bahut sharaab-e-husn ye labaalab ayaagh kis ke hain kaun taabinda hai yaqin mein mire bad-gumaani ke daagh kis ke hain main nahin huun kahin agar 'aazar' chaak par ye suraagh kis ke hain"
Balwan Singh Azar"apni mehnat se bahut log kamaae hue hain zindagi ham tire mazdur hain chhaae hue hain teri jaanib bhi hamein faasle tai karne paDe apni jaanib bhi kahin duur se aae hue hain shahr maangegaa to taa'bir bhi laa deinge ham ye nae khvaab hamaare hi dikhaae hue hain kaisi rut thi ki vo tab bhuul gae the sab kuchh kaisi rut hai ki hamin dhyaan mein laae hue hain ik zaraa saa to safar hai magar in logon ne kaise kaise sar-o-saamaan uThaae hue hain"
Balwan Singh Azar"apni achchhi buri auqaat jie jaataa huun khud ko jiinaa hai so hazraat jie jaataa huun din nikaltaa hai to din ki hi talab rahti hai raat hoti hai to phir raat jie jaataa huun biich kaa kuchh bhi mujhe yaad nahin rahtaa hai aakhiri pahli mulaaqaat jie jaataa huun vo badan yuun bhi talabgaar nahin hai meraa vasl mein hijr ke lamhaat jie jaataa huun mujh ko har chiiz mein imkaan nazar aate hain raushni jab bhi tire saath jie jaataa huun"
Balwan Singh Azar"kisi din dusraa honaa paDegaa mujhe apne sivaa honaa paDegaa bahut din se yahaan main ajnabi huun kisi se aashnaa honaa paDegaa taqaazaa hai badalne kaa mujhe bhi puraane ko nayaa honaa paDegaa tavaazun Thiik ho jaaegaa 'aazar' bhalaa to huun buraa honaa paDegaa"
Balwan Singh Azar"'ajib mauj-e-junun par savaar ho gayaa thaa phir us ke baa'd main be-ikhtiyaar ho gayaa thaa mire vujud mein phir ishtihaar lagne lage ki daf'atan koi mujh mein faraar ho gayaa thaa us ek husn ki aamad hui thi aankhon mein miraa dhaDaktaa huaa dil ghubaar ho gayaa thaa nishaana mujh pe lagaa hai faqat mire dil kaa jahaan ke tiir se to hoshiyaar ho gayaa thaa lagaa thaa pahli nazar mein sabhi ko main mubham dubaara dekhne par aashkaar ho gayaa thaa"
Balwan Singh Azar"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"
Ata Abidi"aakhiri hal thaa yahi pesh-e-nazar jaane diyaa ek gahri saans li phir khvaab mar jaane diyaa saarbaanaa de gavaahi mujh ko pyaari thi anaa rakh liyaa zaad-e-safar aur ham-safar jaane diyaa hazrat-e-naaseh ki khush-uftaadgi pe daad hai khud jidhar se aae the sab ko udhar jaane diyaa is harim-e-naaz mein yuun be-mahaabaa guftugu kuchh bharam rakkhaa to hotaa tum ko gar jaane diyaa tujh ko rokaa jaa rahaa thaa raushni thi jab talak shaam ke Dhalte samay suraj ko ghar jaane diyaa aankh sapne dekhti thi aansuon se kyon bhari chaahti to puchh leti main magar jaane diyaa dostaa qismat na ho to koshishein bekaar hain sabr kaa paimaana ham ne khud hi bhar jaane diyaa dil musir thaa baarhaa kuchh jaanchne ko ruk gae aakhirash us ne hamein baar-e-digar jaane diyaa"
Bushra Masuud"aisaa to yahaan kuchh bhi nahin hadd-e-nazar tak ham ko to pahunchnaa thaa kisi khvaab-nagar tak ab paanv nahin raah mein dil thakne lagaa hai lekin hamein chalnaa to hai anjaam-e-safar tak ham shor bhi sunte hain samaaat se bahut kam aavaaz bhi jaati hai to bas hadd-e-nazar tak mumkin hai main ab sabr kaa ye peD giraa duun jab haath pahunchtaa hi nahin shaakh-e-samar tak ham apne hi mausam se parakhte hain jahaan ko maahaul kaa lete hi nahin koi asar tak main apne hi andar ki taraf chikh rahaa huun ab dekhiye jaati hai ye aavaaz kidhar tak"
"tire jamaal se ham runumaa nahin hue hain chamak rahe hain magar aaina nahin hue hain dhaDak rahaa hai tu ik ism ki hai ye barakat vagarna vaaqiye is dil mein kyaa nahin hue hain bataa na paaein to khud tum samajh hi jaao ki ham bilaa javaaz to be-maajraa nahin hue hain tiraa kamaal ki aankhon mein kuchh zabaan pe kuchh hamein to moajize aise ataa nahin hue hain ye mat samajh ki koi tujh se munharif hi nahin abhi ham ahl-e-junun lab-kushaa nahin hue hain ba-naam-e-zauq-e-sukhan khud-numaai aap karein ham is maraz mein abhi mubtalaa nahin hue hain hami vo jin kaa safar maavaraa-e-vaqt-o-vajud hami vo khud se kabhi jo rihaa nahin hue hain khud-aagahi bhi khaDi maangti hai apnaa hisaab junun ke qarz bhi ab tak adaa nahin hue hain kisi ne dil jo dukhaayaa kabhi to ham 'irfaan' udaas ho gae lekin khafaa nahin hue hain"
Irfan Sattar"ba-zom-e-aql ye kaisaa gunaah main ne kiyaa ik aainaa thaa usi ko siyaah main ne kiyaa ye shahr-e-kam-nazaraan ye dayaar-e-be-hunaraan kise ye apne hunar kaa gavaah main ne kiyaa harim-e-dil ko jalaane lagaa thaa ek khayaal so gul use bhi ba-yak sard aah main ne kiyaa vahi yaqin rahaa hai javaaz-e-ham-safari jo gaah us ne kiyaa aur gaah main ne kiyaa bas ek dil hi to hai vaaqif-e-rumuz-e-hayaat so shahr-e-jaan kaa use sarbaraah main ne kiyaa har ek ranj usi baab mein kiyaa hai raqam zaraa saa gham thaa jise be-panaah main ne kiyaa ye raah-e-ishq bahut sahl ho gai jab se hisaar-e-zaat ko paivand-e-raah main ne kiyaa ye umr ki hai basar kuchh ajab tavaazun se tiraa huaa na hi khud se nibaah main ne kiyaa khirad ne dil se kahaa tu junun-sifat hi sahi na puchh us ki ki jis ko tabaah main ne kiyaa"
Irfan Sattar"faqat saje hue divaar-o-dar kaa kyaa matlab jahaan sukun nahin aise ghar kaa kyaa matlab kisi ke kaam na aae to zar kaa kyaa matlab na phal na chhaanv hai aise shajar kaa kyaa matlab na raaston kaa Thikaana na manzilon kaa pataa tire baghair mire is safar kaa kyaa matlab koi hayaat ke maani bataa ke samjhaae tavil kyaa hai bhalaa mukhtasar kaa kyaa matlab"
Sandeep Gupte