ban ke aansu miri aankhon mein samaane vaale — Ameer Hamza Salfi

"baDe kaThin hain sabhi raaste mohabbat ke ki jaan-levaa hain ye haadse mohabbat ke abhi to thoDaa saa kaaTaa hai ye safar ham ne kahaan gae hain tire valvale mohabbat ke vahaan vahaan hi mili hain udaasiyaan ham ko jahaan jahaan se mile tabsire mohabbat ke hamein hi raas nahin aai hai mohabbat ye kisi se kyaa karein shikve-gile mohabbat ke zarur main bhi nazar aaungaa sar-e-maqtal nikal paDe hain agar qaafile mohabbat ke ye baat sirf kitaabon talak nahin 'hamza' haqiqatan bhi bane maqbare mohabbat ke"

"kyon huaa baab vaa udaasi kaa kuchh bigaaDaa hai kyaa udaasi kaa main ne kaaghaz pe sher likh kar phir rang us mein bharaa udaasi kaa muskuraataa chalaa gayaa phir main dil bahut thaa jalaa udaasi kaa tum mire ghar dobaara aae ho phuul phir se khilaa udaasi kaa miri tishna-labi miTaa saaqi ek saagar pilaa udaasi kaa kis ne toDaa shajar mire ghar se ki parinda uDaa udaasi kaa nahin maalum tujh ko bhi 'hamza' tu bhi hai manchalaa udaasi kaa"

"achchhaa miraa khayaal hai tum kyon chale gae ab tak mujhe malaal hai tum kyon chale gae shikva na thaa na koi shikaayat thi mujh se jab phir tum se ye savaal hai tum kyon chale gae mujh ko to Das rahi hain ye aayaat-e-vasl bhi aur hijr bhi muhaal hai tum kyon chale gae sochaa na tum ne meraa ki kaise tumhaare bin mushkil ye sab vabaal hai tum kyon chale gae tum to chale gae ho magar jaante ho tum dukh se ye dil niDhaal hai tum kyon chale gae tum to nahin ho main huun fughaan hai sukut hai aur vahshaton kaa jaal hai tum kyon chale gae uThtaa hai mere dil mein musalsal jo kuchh nahin 'hamza' vo bas savaal hai tum kyon chale gae"

"aae koi hamraaz sitamgar koi aae hasrat thi kabhi mere baraabar koi aae aati hain mire dil ke kivaaDon se sadaaein ik baar kabhi mere bhi dar par koi aae viraan paDi hai ye haveli bhi kabhu ki hasrat hai ki is dil ke bhi andar koi aae ham baiThe hain is aas pe kab ke mire allaah zar aae sadaf aae yaa gauhar koi aae jis ne kabhi basti se nikaalaa mujhe 'hamza' ab us ki ye hasrat ki mayassar koi aae"

"khaamushi se nikalti baat kaa dukh jaantaa huun tumhaari zaat kaa dukh nim-shab ki khamoshi aur gham-e-dil noch letaa hai aankh raat kaa dukh bas main shikva-kunaan nahin tujh se mujh ko vaise hai teri baat kaa dukh haar kar bhi main jiit jaaungaa bas kabhu ho jo tujh ko maat kaa dukh tum ne jiinaa hai main ne jiinaa hai jaan nikaalegaa ye hayaat kaa dukh mere jiine pe bhi na raazi thaa tujh ko honaa thaa kyaa vafaat kaa dukh dost ghamgin na hon mire 'hamza' paal lungaa main paanch saat kaa dukh"

"ajab huun main ki jo khud dard-e-sar banaataa huun makaan ban nahin saktaa main ghar banaataa huun utaartaa huun main vahshat varaq pe pahle phir jo rang udaasi kaa bhartaa huun Dar banaataa huun uDaanaa main ne hai unchi uDaan shaahin ko to fikr-o-fan se main bhi baal-o-par banaataa huun kabhi to kuuch hi karnaa hai mujh ko duniyaa se to phir main kis liye yaan mustaqar banaataa huun kashid kartaa huun main bhi kisi tamannaa ko gumaan taraashtaa huun dard-e-sar banaataa huun main khud ko Dasne lagaa huun kahaani gar 'hamza' main khud ko phir se yahaan maar kar banaataa huun"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"