be-vajh nahin un kaa be-khud ko bulaanaa hai — Abbas Ali Khan Bekhud

"main to fidaa-e-nargis-e-mastaana ho gayaa paimaana se dil ab miraa mai-khaana ho gayaa har rang mein mujhe hai mae mushk-bu kaa rang jo zarf haath aa gayaa paimaana ho gayaa kuchh makhmasaat-e-dahr the divaangi se kam achchhaa huaa ki ishq mein divaana ho gayaa dil chaahiye gudaaz nahin zor-o-zar se kaam apni misaal ishq mein parvaana ho gayaa hotaa na baagh-e-dil kabhi shaahaan-e-iltifaat achchhaa huaa bahaar mein viraana ho gayaa daanaai zer-e-daam hai ai murgh-e-dil abas maanaa ki daana khaa ke tu ab daanaa ho gayaa 'bekhud' to naa-rasaai zulf-e-butaan na puchh qismat pe meri khanda-zan ab shaana ho gayaa"

"nigaahon ko zabaan karnaa khamoshi ko bayaan karnaa ayaan karnaa bhi raaz-e-dil kabhi to yuun ayaan karnaa havaa-e-sud mein rahnaa na parvaa-e-ziyaan karnaa haqiqat mein hai saamaan-e-nashaat-e-jaavedaan karnaa kashida ho gae tum jab kashish saabit hui dil ki samajh kar chaahiye thaa jazb-e-dil kaa imtihaan karnaa vafaa kaa zikr khud karnaa khilaaf-e-rasm-e-ulfat hai subuk ho kar na pesh-e-dost baar-e-gham-garaan karnaa ba-in be-dast-o-paai mil bhi jaaegaa to kyaa hogaa abas hai fikr-e-manzil mein talaash-e-kaarvaan karnaa mujhe teri razaa marghub thi varna na thaa mumkin jafaa-e-dostaan sahnaa sanaa-e-dushmanaan karnaa unhein zid hai ki hain aazurda mujh se be-sabab varna nahin hai jurm kuchh zikr-e-jafaa-e-aasmaan karnaa sar-e-mimbar hai vaaiz mo'tariz kyon but-parasti par yahaan laazim nahin mard-e-khudaa zikr-e-butaan karnaa kisi kaa raaz itnaa qimti thaa qalb-e-'bekhud' mein khamoshi ko zaruri ho gayaa qufl-e-dahaan karnaa"

"hijr ki shab zulf-e-barham kaa khayaal aataa rahaa ik na ik har din mire sar par vabaal aataa rahaa shukr hai taarik dil mein raushni ke vaaste go tasavvur mein sahi us kaa jamaal aataa rahaa hai karam us kaa ki ham se be-basar ke vaaste aalam-e-amsaal mein vo be-misaal aataa rahaa bhulne vaale ko aakhir dil bhulaae kis tarah be-khayaali mein bhi jab us kaa khayaal aataa rahaa main ne apni khastagi ki daad paai is tarah mere arz-e-haal par un ko jalaal aataa rahaa bas yahi kyaa kam hai meri saaf-goi ki dalil un ke dil mein meri jaanib se malaal aataa rahaa kyaa bigaD jaataa jo ho jaati tavajjoh ki nazar muddaton dar par gadaa-e-be-savaal aataa rahaa mujh ko 'bekhud' jab kabhi aayaa hai tauba kaa khayaal der tak apne gunaahon kaa khayaal aataa rahaa"

"nigaah-e-mehr se dekho na gham-zada dil ko banaao aur na mushkil hamaari mushkil ko zamaana qatl huaa aur vo rahi pyaasi gilaa hai abru-e-qaatil se tegh-e-qaatil ko mire khayaal ne khalvat ko kar diyaa mahfil tiri nigaah ne khalvat banaayaa mahfil ko na jaane dil kaa tujhe kuchh khayaal hai ki nahin tiraa khayaal to vajh-e-nashaat hai dil ko nishaan-e-manzil-e-maqsud paa hi jaaegaa vo rah-navard ki madfan banaa de manzil ko jilaa de barq jo haasil se hai yahi haasil ki khauf-e-barq se haasil na ho sukun dil ko kahaan se aai ye hairat nigaah-e-'bekhud' mein ki us ko dekh ke sakta hai ahl-e-mahfil ko"

"ham-nashinon mein hamaaraa ham-navaa koi nahin aashnaa to hain bahut dard-aashnaa koi nahin ai masihaa maut se kar zindagaani kaa ilaaj ho rahe vo ghair ke ab aasraa koi nahin but-kade se chhuT kar aisaa hue be-khaanumaan jaise zer-e-aasmaan meraa khudaa koi nahin khud-numaai mein bhi vo mahbub hai mastur hai dekhte hain sab magar pahchaantaa koi nahin burrish-e-tegh-e-adaa-e-dost kaa ehsaas hai ab rahin-e-minnat-e-tir-e-qazaa koi nahin hai tiri mashq-e-sitam kaa rang agar yunhi to phir dekhaa lenaa ek din tere sivaa koi nahin puchhte hain muddaaa mujh se adu ke saamne muddaaa ye hai ki kah duun muddaaa koi nahin baa-vafaa itni jafaa par kaun hai mere sivaa tujh se baDh kar bad-gumaan ai bevafaa koi nahin baDh gayaa hai aaj kal jaur-e-butaan kuchh is qadar dast-gir-e-bandagaan goyaa khudaa koi nahin le ke baar-e-zindagi kab tak koi phirtaa rahe raahzan hi luuT le jab rahnumaa koi nahin jaan kar 'bekhud' huaa khud dushman apni jaan kaa phir gilaa kyuun doston se hai miraa koi nahin"

"hai ye to khizaan ne ruup bharaa ham jis ko bahaaraan kahte hain bas ek nazar kaa dhokaa hai sab jis ko gulistaan kahte hain izzat bhi hai daulat bhi par aadamiyat kaa naam nahin ham kis ko hindu kahte hain ham kis ko musalmaan kahte hain kuchh der ho to ham sabr karein andher nahin dekhaa jaataa hai apne ghar mein aag lagi sab jis ko charaaghaan kahte hain ai saath safar karne vaalo Thahro na yahaan aage ko baDho ham jis ko manzil samjhe hain sab bhul-bhulayyaan kahte hain jab aql mujhe samjhaati hai behosh na ho naadaan na ban dil se gham-e-jaanaan kahtaa hai us ko gham-e-dauraan kahte hain hain dafn yahaan daulat vaale taaqat vaale izzat vaale qudrat kaa dafina hai jis ko ham gor-e-gharibaan kahte hain pi ghaafil ab parhez na kar kuchh talkh sahi kuchh tez sahi le de ke yahi hai ek davaa-e-gardish-e-dauraan kahte hain maikhaane ke phere kartaa hai ab vaaiz 'bekhud' sunte hain us ne bhi shaayad baandh liyaa paimaane se paimaan kahte hain"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"taavil-e-ahd-e-fan hi to vahshat kaa hal nahin pesh-e-nazar junun hai yaaro ghazal nahin ab is ke baad ahd ki taarik raat hai ye ikhtitaam-e-shaam hai subh-e-azal nahin ai dost ishq mansab-e-fahm-o-shuur hai ye irtiqaa hai zehn kaa koi khalal nahin ik umr ratjagon ki aziyyat mein kaaT di ab mere khvaab niind kaa radd-e-amal nahin kyaa kyaa ataa-e-neamat-e-rabb-e-karim hai lekin 'samir' dard kaa nemul-badal nahin"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"chaahe khoTe hain yaa khare hain ham Dast-e-qudrat ke laaDle hain ham 'aks-e-rafta ko dekhiye saahib kitne maa'sum lag rahe hain ham raat jivan kaa giit gaati hai khvaab-e-tanvim dekhte hain ham 'umr lag jaaegi sanbhalne mein kis bulandi se yuun gire hain ham ek hangaam hai taghayyur kaa kunj-e-nisyaan mein paDe hain ham ab bhi mehndi kaa rang gahraa hai sandalin haath par rache hain ham ik tamaashaa hai kaar-zaar-e-hayaat dekh kar ser ho chuke hain ham jhilmilaate hain aarzu ke kanval dil-jharoke se jhaankte hain ham"