dil jaltaa hai shaam savere — Qateel Shifai

"raabta laakh sahi qaafila-saalaar ke saath ham ko chalnaa hai magar vaqt ki raftaar ke saath gham lage rahte hain har aan khushi ke pichhe dushmani dhuup ki hai saaya-e-divaar ke saath kis tarah apni mohabbat ki main takmil karun gham-e-hasti bhi to shaamil hai gham-e-yaar ke saath lafz chuntaa huun to mafhum badal jaataa hai ik na ik khauf bhi hai jurat-e-izhaar ke saath dushmani mujh se kiye jaa magar apnaa ban kar jaan le le miri sayyaad magar pyaar ke saath do ghaDi aao mil aaein kisi 'ghaalib' se 'qatil' hazrat-e-'zauq' to vaabasta hain darbaar ke saath"

"vahi gesuon ki uDaan hai vahi aarizon kaa nikhaar hai ye kisi ki shaan-e-varud hai ki miri nazar kaa vaqaar hai tiri khud-pasand navaazishein miraa ji lubhaa ke guzar gaiin magar uf ye dida-e-mutmain jo gadaa-e-raah-guzaar hai abhi konpalon mein vo ras kahaan jo gulon kaa ruup badal sake abhi gul-farosh ke haath se hamein ehtiyaaj-e-bahaar hai miri saadgi ke khulus ne tujhe bakhsh di vo barahnagi jo nafas nafas ki hai tishnagi jo nazar nazar ki pukaar hai yahi dil-fareb tajalliyaan mujhe do-jahaan se aziiz huun magar ai jamaal-e-sahar-numaa miraa ghar jo tira-o-taar hai gham-e-zaat se miri zindagi gham-e-kaaenaat mein Dhal gai kisi bazm-e-naaz mein kho ke bhi mujhe kaaenaat se pyaar hai"

"yaaro kahaan tak aur mohabbat nibhaaun main do mujh ko bad-duaa ki use bhuul jaaun main dil to jalaa kiyaa hai vo shoala saa aadmi ab kis ko chhu ke haath bhi apnaa jalaaun main suntaa huun ab kisi se vafaa kar rahaa hai vo ai zindagi khushi se kahin mar na jaaun main ik shab bhi vasl ki na miraa saath de saki ahd-e-firaaq aa ki tujhe aazmaaun main badnaam mere qatl se tanhaa tu hi na ho laa apni mohr bhi sar-e-mahzar lagaaun main utraa hai baam se koi ilhaam ki tarah ji chaahtaa hai saari zamin ko sajaaun main us jaisaa naam rakh ke agar aae maut bhi hans kar use 'qatil' gale se lagaaun main"

"kyaa is kaa gilaa kiije use pyaar hi kab thaa vo ahd-e-faraamosh vafaadaar hi kab thaa us ne to sadaa puuje hain uDte hue jugnu vo chaand-sitaaron kaa parastaar hi kab thaa ham Duub gae jaagti raaton ke bhanvar mein haath us kaa hamaare liye patvaar hi kab thaa aamon ki hasin rut ke sivaa bhi to vo kuuke lekin kisi koyal kaa ye kirdaar hi kab thaa aavaaz jo main duun to kisi aur ko chhu le is aankh-micholi se vo bezaar hi kab thaa tum us ko bure naam se yaaro na pukaaro ye naam use baais-e-aazaar hi kab thaa mashhur-e-zamaana hain 'qatil' us ki uDaanein vo daam-e-mohabbat mein giraftaar hi kab thaa"

"pyaar dulaar ke saae saae chalaa karo jalte logo kuchh to apnaa bhalaa karo pyaar ki aanch nikhaar kaa baais banti hai jalnaa hai to pyaar ki aag mein jalaa karo soch tumhaari kundan ban kar damkegi kisi ki tapti yaadon mein tum Dhalaa karo peD yahaan kuchh sadaa-bahaar bhi hote hain mausam mausam tum bhi phulaa-phalaa karo koi manzar paanv ki zanjir nahin vaadi vaadi aazaadi se chalaa karo is mein hain kuchh badnaami ke pahlu bhi jhuTe chhalbal se mat kisi ko chhalaa karo nangaa kar deti hai gham ko hansi 'qatil' chehre par ye ghaaza kam kam karaa karo"

"ai dost! tiri aankh jo nam hai to mujhe kyaa main khuub hansungaa tujhe gham hai to mujhe kyaa kyaa main ne kahaa thaa ki zamaane se bhalaa kar ab tu bhi sazaavaar-e-sitam hai to mujhe kyaa haan le le qasam gar mujhe qatra bhi milaa ho tu shaaki-e-arbaab-e-karam hai to mujhe kyaa jis dar se nadaamat ke sivaa kuchh nahin miltaa us dar pe tiraa sar bhi jo kham hai to mujhe kyaa main ne to pukaaraa hai mohabbat ke ufaq se raste mein tire sang-e-haram hai to mujhe kyaa bhulaa to na hogaa tujhe suqraat kaa anjaam haathon mein tire saaghar-e-sam hai to mujhe kyaa patthar na paDein gar sar-e-baazaar to kahnaa tu motarif-e-husn-e-sanam hai to mujhe kyaa main sarmad o mansur banaa huun tiri khaatir ye bhi tiri ummid se kam hai to mujhe kyaa"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"