din ho yaa raat ham ko chalnaa hai — Daud Ghazi

"mizaaj-e-aalam-e-imkaan hai barham dekhiye kyaa ho sitam-kash pai-ba-pai hote hain baaham dekhiye kyaa ho gae vo din ki aavaazon pe khaamoshi kaa pahra thaa ba-har su gunjtaa hai soz-e-paiham dekhiye kyaa ho ye kaisaa rang-e-mahfil hai pareshaan hai bahut saaqi bane baiThe hain sab mai-khvaar hamdam dekhiye kyaa ho chaman mein rang laaegi sabaa ki aabla-paai pilaati hai lahu shaakhon ko shabnam dekhiye kyaa ho nazar Takraa rahi hai ab shuaa-e-mehr-e-taabaan se hui hai khushk kab ki chashm-e-pur-nam dekhiye kyaa ho rah-e-gham mukhtasar kar di hai bazm-e-naa-shakebaa ne hue hain manzilon ke faasle kam dekhiye kyaa ho"

"jab tasavvur mein kisi ko paas paa letaa huun main ik niraale kaif ko dil mein basaa letaa huun main jab bhi yaad aati hain tere gesuon ki raahatein raat ki taarikiyon mein muskuraa letaa huun main chaahtaa huun jab ki teri yaad ko raushan karun gham ki vaadi mein nai shamein jalaa letaa huun main raah mein sukhaa huaa patta bhi miltaa hai agar us pareshaan-haal ko saathi banaa letaa huun main sochtaa huun kitnaa gham-andoz hai teraa khayaal phir usi se ik nayaa jaadu jagaa letaa huun main"

"gham-e-hayaat mein jaise bhi zindagi ki hai tumhaari yaad to lekin kabhi kabhi ki hai jo gham milaa thaa to ye chaahaa gham-e-ziyaad mile siyaah shab mein tamannaa-e-raushni ki hai hayaat saath mein laai hai maut kaa saamaan kisi ne ham se bahut khuub dil-lagi ki hai ye gham ki raat nahin jis ki intihaa koi tire baghair basar kuchh ajiib si ki hai nigaah-e-yaar kaa is mein koi qusur nahin ki ham ne dil ki kharaabi to aap hi ki hai"

"tamaam vaqt tumhin se kalaam karte hain shab-e-firaaq kaa yuun ehtimaam karte hain sajaae rakhte hain har vaqt ham nae din-raat tumhaare vaaste ye iltizaam karte hain khayaal-e-yaar se karte hain subh kaa aaghaaz umid-e-yaar ke saae mein shaam karte hain kahaan miTe hain kisi se nuqush-e-ahl-e-shauq jo naa-samajh hain vo ye sai-e-khaam karte hain chhupaa ke rakkhe hain saaqi ne saaghar-o-minaa isi sabab to fughaan tishna-kaam karte hain ye be-sabab to nahin itne shohra-e-aafaaq tumhaare naam se ham apnaa naam karte hain gham-e-hayaat se aadaab-e-zindagi sikhe gham-e-hayaat kaa ham ehtiraam karte hain"

"jazba-e-nau bhi to hai hasrat-e-naakaam ke saath khvaahish-e-subh ubharti to hai har shaam ke saath ho vo tahsin ke hamraah ki dushnaam ke saath aa to jaataa hai miraa naam tire naam ke saath tere kuche se bhi guzraa huun main ai husn-e-talab subh ke saath kabhi aur kabhi shaam ke saath mushkilein raah mein aati to bahut hain lekin yaad kar letaa huun main tujh ko har ik gaam ke saath pahle meraa thaa ye gham ab hai zamaane bhar kaa gham bhi gardish mein rahaa gardish-e-ayyaam ke saath jhumti aati hai khushbu se bhari aati hai jab bhi aati hai sabaa aap ke paighaam ke saath"

"sitam kaa khauf nahin hai alam ki baat nahin rah-e-talab mein kisi pech-o-kham ki baat nahin visaal-e-yaar ki ummid bhi ajab shai hai hazaar gham hain magar phir bhi gham ki baat nahin chalo ki mil ke madavaa-e-gham karein ham log hai sab ko ek hi gham besh-o-kam ki baat nahin tumhaari zulf hai mumkin hai khud sanvar jaae tumhaari zulf mein kuchh pech-o-kham ki baat nahin sitamgaron pe in ashkon kaa kyaa asar hogaa hayaat-e-jehd hai kuchh chashm-e-nam ki baat nahin"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"taavil-e-ahd-e-fan hi to vahshat kaa hal nahin pesh-e-nazar junun hai yaaro ghazal nahin ab is ke baad ahd ki taarik raat hai ye ikhtitaam-e-shaam hai subh-e-azal nahin ai dost ishq mansab-e-fahm-o-shuur hai ye irtiqaa hai zehn kaa koi khalal nahin ik umr ratjagon ki aziyyat mein kaaT di ab mere khvaab niind kaa radd-e-amal nahin kyaa kyaa ataa-e-neamat-e-rabb-e-karim hai lekin 'samir' dard kaa nemul-badal nahin"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"kyaa manzil-e-gham simaT gai hai ik aah mein raah kaT gai hai phir saamne hai pahaaD si raat phir shaam se niind uchaT gai hai pahlu mein ye kaisaa dard uThaa hai ye kaun si raah kaT gai hai aap aae nahin to maut kambakht aa aa ke palaT palaT gai hai uTh uTh ke mariz-e-gham ne puchhaa kyaa hijr ki raat kaT gai hai phir 'saif' havaa-e-yaad-e-rafta har gham ki naqaab ulaT gai hai"