kyaa manzil-e-gham simaT gai hai — Saifuddin Saif

"ab vo saudaa nahin divaanon mein khaak uDti hai bayaabaanon mein gham-e-dauraan ko gila hai mujh se tu hi tu hai mire afsaanon mein dil-e-naadaan tiri haalat kyaa hai tu na apnon mein na begaanon mein bujh gai shama sahar se pahle aag jalti rahi parvaanon mein dil ne chhoDaa na umidon kaa khayaal phuul khilte rahe viraanon mein 'saif' pahlu mein ye aahaT gham ki kaun rotaa hai bayaabaanon mein"

"phail rahe hain vaqt ke saae dekhein raat kahaan tak jaae dida-o-dil ki baat na puchho ek lagaae ek bujhaae aaj ye hai mausam kaa taqaazaa zulf tiri khul kar lahraae in aankhon se moti barse in honTon ne phuul khilaae dekh-bhaal kar zahr piyaa hai soch-samajh kar dhoke khaae aaj vo tanhaa raat kaTi hai aansu tak aankhon mein na aae 'saif' zamaana samjhaataa hai kaun apne hain kaun paraae"

"chaandni raat baDi der ke baa'd aai hai lab pe ik baat baDi der ke baa'd aai hai jhuum kar aaj ye shab-rang laTein bikhraa de dekh barsaat baDi der ke baa'd aai hai dil-e-majruh ki ujDi hui khaamoshi se bu-e-naghmaat baDi der ke baa'd aai hai aaj ki raat vo aae hain baDi der ke baa'd aaj ki raat baDi der ke baa'd aai hai aah taskin bhi ab 'saif' shab-e-hijraan mein aksar auqaat baDi der ke baa'd aai hai"

"hasin raaton jamil taaron ki yaad si rah gai hai baaqi kuchh apni ujDi hui bahaaron ki yaad si rah gai hai baaqi har ek mahfil paDi hai suuni tamaam mele bichhaD chuke hain sitamgaron ki sitam-shiaaron ki yaad si rah gai hai baaqi gham-e-vafaa kahne sunne vaale kahaan gae ahl-e-dil na jaane tumhaari ulfat ke raaz-daaron ki yaad si rah gai hai baaqi vo shaam se aarzu sahar ki vo be-kali raat raat bhar ki un aashnaa aashnaa sitaaron ki yaad si rah gai hai baaqi udhar bhi ahd-e-vafaa ke TukDe khaTak ke pahlu mein so chuke hain yahaan bhi TuuTe hue sahaaron ki yaad si rah gai hai baaqi gilaa nahin 'saif' be-kasi kaa kisi kaa gham kaun puchhtaa hai yahi bahut hai ki gham-gusaaron ki yaad si rah gai hai baaqi"

"miri daastaan-e-hasrat vo sunaa sunaa ke roe mire aazmaane vaale mujhe aazmaa ke roe koi aisaa ahl-e-dil ho ki fasaana-e-mohabbat main use sunaa ke rouun vo mujhe sunaa ke roe miri aarzu ki duniyaa dil-e-naa-tavaan ki hasrat jise kho ke shaadmaan the use aaj paa ke roe tiri bevafaaiyon par tiri kaj-adaaiyon par kabhi sar jhukaa ke roe kabhi munh chhupaa ke roe jo sunaai anjuman mein shab-e-gham ki aap-biti kai ro ke muskuraae kai muskuraa ke roe"

"vafaa anjaam hoti jaa rahi hai mohabbat khaam hoti jaa rahi hai zaraa chehre se zulfon ko haTaa lo ye kaisi shaam hoti jaa rahi hai qayaamat hai mohabbat rafta-rafta gham-e-ayyaam hoti jaa rahi hai sunaa hai ab tire lutf-o-karam ki hikaayat aam hoti jaa rahi hai dikhaane ko zaraa aankhein badal lo vafaa ilzaam hoti jaa rahi hai mire jazb-e-vafaa se khaamushi bhi tiraa paighaam hoti jaa rahi hai koi karvaT badal ai dard-e-hasti tamannaa daam hoti jaa rahi hai mohabbat 'saif' ik lutf-e-nihaan thi magar badnaam hoti jaa rahi hai"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"murattab aur bhi ik goshvaara ho rahaa hai to kyaa hai gar abhi ham ko khasaara ho rahaa hai hamaare paas to ham se ziyaada tu nahin thaa so tu kyaa ab to khud se bhi kinaara ho rahaa hai hamaare khvaab mein ahmiyat-e-shab thi ziyaada so ab vo khvaab aankhon mein sitaara ho rahaa hai tumhaari aarzu hone se pahle bhi to ham the guzaara ho rahaa thaa so guzaara ho rahaa hai hayaa-aalud aankhein hain na aanchal hai na chilman ye kis viraan duniyaa kaa nazaara ho rahaa hai abhi ham faisla karne ki ujlat mein nahin hain magar lagtaa hai jiine se khasaara ho rahaa hai khalaa se is zamin par sang-rezo ki ye baarish kisi jaanib se kyaa koi ishaara ho rahaa hai"

"choT par choT khaa rahaa huun main 'aadatan muskuraa rahaa huun main us ke uupar to kuchh asar hi nahin apnaa dil kyon jalaa rahaa huun main aaj tanhaai mein jo baiThe ho kyaa tumhein yaad aa rahaa huun main kaun aaegaa mujh se milne ko apnaa ghar kyon sajaa rahaa huun main aaj ji bhar ke dekh lo mujh ko ab bahut duur jaa rahaa huun main kyaa tumhein ab bhi kuchh shikaayat hai ab to sab kuchh kamaa rahaa huun main haath mein Digriyaan sajaae hue Thokarein kitni khaa rahaa huun main ab mujhe peT in se bharnaa hai ye jo khanjar banaa rahaa huun main kal koi is ko bhi na chhoDegaa ye jo paudaa lagaa rahaa huun main"