ek dil be-qaraar aur duniyaa — Chandrabhan Khayal

"kaun kahtaa hai mahv-e-khvaab huun main sach to vo hai ki inqalaab huun main zindagi kyaa hai aur maut hai kyaa in savaalaat kaa javaab huun main khauf khaati hai mujh se khaamoshi dasht mein gunjtaa rabaab huun main shahr ke bheDiyon se kyaa Darnaa jangli sher saa shabaab huun main har varaq jis kaa aag aur dhuaan daastaanon ki vo kitaab huun main tum andhere mein kyon chale aae raushni mein bhi be-hisaab huun main mujh ko jugnu kaa naam de ke na hans apni duniyaa kaa aaftaab huun main"

"nafrat ki siyaasat 'aam hui ikhlaas-o-mohabbat bhuul gae ham apne buzurgon ki hikmat paighaam-o-nasihat bhuul gae mazhab ke maqaasid ik jaise afkaar-o-‘aqaaed yak-rangi ik raah pe chalne vaale sab sadiyon ki rifaaqat bhuul gae ye mandir-o-masjid ke jhagDe ye shaikh-o-barahman ke qisse sab farq-o-zalaalat yaad magar imaan ki haraarat bhuul gae 'aashiq hain rasul-e-rab ke sabhi hain raam ke divaane bhi sabhi donon ki qayaadat ke haami kyon naqsh-e-qayaadat bhuul gae saavan ke vo jhulon ki shohrat ramzaan ke rozon ki barkat holi ki bahaaron ki halchal 'idon ki sa'aadat bhuul gae hain raam ke ghaazi saif-ba-kaf be-kaif namaazi sang-ba-kaf donon haq ke haami lekin haq hi ki haqiqat bhuul gae sab jangal kaaT diye lekin zehnon se vo vahshi-pan na gayaa aabaad hain shahron mein lekin tahzib-o-saqaafat bhuul gae"

"ho gai nangi ye duniyaa mere aage ik tamaasha hai anokhaa mere aage raqs-e-tufaan-e-havaadis hai ki jaise naachtaa ho koi bachcha mere aage ab nahin kuchh farq paDtaa tishnagi ko ik samundar ho ki sahraa mere aage har zamaane ko diye malbus jis ne vo barahna hai saraapaa mere aage ban rahe hain kuchh bahaane bebasi ke miT na jaae meri duniyaa mere aage mere pichhe 'ilm kaa suraj hai phir bhi chhaa rahaa hai kyon andheraa mere aage"

"paani se duur rah ke bhi tairaak ho gae ab saada-lauh log bhi chaalaak ho gae maanind-e-barq yaa ki thaa vo surat-e-sharar aise nazar uThaai ki ham khaak ho gae mushkil na thi to Darte nahin the kisi se ham mushkil mein aa ke aur bhi bebaak ho gae tanhaa rahe to khud kaa pata thaa na ghaib kaa un se mile to saahib-e-idraak ho gae ham ko achhut jaan ke dekho na duur se chhu kar hamein bhi log kai paak ho gae ki bandagi rasul-e-khudaa ki to dekhiye ham bhi 'khayaal' shaa'ir-e-laulaak ho gae"

"koi daanaa koi divaana milaa shahr mein har shakhs begaana milaa main use pahchaan to letaa magar jab milaa vo ban ke afsaana milaa niim ke patton si kaDvi har khushi dekhiye mujh ko ye nazraana milaa shor thaa vo paikar-e-paikaar hai azm us kaa bhi marizaana milaa zindagi ke naam par mujh ko 'khayaal' ek zahrilaa siyah-khaana milaa"

"parda chehre se haTaae to ghazal ho jaae zindagi saamne aae to ghazal ho jaae sard saDkon pe sisakte hue sannaaTon kaa dard jab dil mein samaae to ghazal ho jaae soz har lafz ke siine mein nihaan hai ab bhi khaamushi saaz uThaae to ghazal ho jaae shahr-e-ehsaas agar narm lab-o-lahje mein daastaan apni sunaae to ghazal ho jaae din ke hangaamon mein gum-karda har ik fikr miri shab ki aaghosh mein aae to ghazal ho jaae kab se baiThaa huun khayaalaat kaa khema taane karb-e-takhliq sataae to ghazal ho jaae shaam-e-gham jaam-ba-kaf hai to is 'aalam mein 'khayaal' hosh bhi haath milaae to ghazal ho jaae"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"shab ki taarik raahdaari hai aur miraa khauf iztiraari hai sabz khvaabon ki kam se kam qimat zindagi bhar ki ashk-baari hai ik musallat-shuda tamaddun ko ye na kahiye ki ikhtiyaari hai shash-jihaati mushaahida hai miyaan tajrabon ki sanad pe bhaari hai shukriya aap ki mohabbat kaa dil kaa maqsum sogvaari hai tajziye sun ke muskuraa denaa apni itni hi zimmedaari hai"

"ye hai mai-kada yahaan rind hain yahaan sab kaa saaqi imaam hai ye haram nahin hai ai shaikh ji yahaan paarsaai haraam hai jo zaraa si pi ke bahak gayaa use mai-kade se nikaal do yahaan tang-nazar kaa guzar nahin yahaan ahl-e-zarf kaa kaam hai koi mast hai koi tishna-lab to kisi ke haath mein jaam hai magar is pe koi kare bhi kyaa ye to mai-kade kaa nizaam hai ye janaab-e-shaikh kaa falsafa hai 'ajib saare jahaan se jo vahaan piyo to halaal hai jo yahaan piyo to haraam hai tujhe apne husn kaa vaasta mere shauq-e-did pa rahm khaa zaraa muskuraa ke naqaab uThaa ki nazar ko shauq-e-salaam hai na sunnaa to huur o qusur ki ye hikaayatein mujhe vaa'izaa koi baat kar dar-e-yaar ki dar-e-yaar hi se to kaam hai na to e'tikaaf se kuchh gharaz na savaab-o-zuhd se vaasta tiri diid aisi namaaz hai na sujud hai na qayaam hai ye durust ki 'aib hai mai-kashi ye ba-jaa ki baada haraam hai magar ab savaal ye aa paDaa ki tumhaare haath mein jaam hai jo uThi to subh-e-davaam thi jo jhuki to shaam hi shaam thi tiri chashm-e-mast mein saaqiyaa miri zindagi kaa nizaam hai miraa farz hai ki paDaa rahun tiri baargaah mein saaqiyaa koi tishna-lab hai ki sair hai yahi dekhnaa tiraa kaam hai isi kaaenaat mein ai 'jigar' koi inqalaab uThegaa phir ki buland ho ke bhi aadmi abhi khvaahishon kaa ghulaam hai"