gham diye hain to iztiraab na de — Gauhar Usmani

"rukh se fitrat ke hijaabaat uThaa detaa hai aaina TuuT ke patthar ko sadaa detaa hai azmat-e-ahl-e-vafaa aur baDhaa detaa hai gham-e-musalsal ho to phir gham bhi mazaa detaa hai dil dhaDaktaa hai to pahron nahin sone detaa niind aati hai to ehsaas jagaa detaa hai tum ne shaayad kabhi is baat ko sochaa hogaa vaqt haathon ki lakirein bhi miTaa detaa hai jo mire qatl ke darpai thaa na jaane kab se aaj vo bhi mujhe jiine ki duaa detaa hai apne kirdaar pe maujon ko bhi sharm aati hai jab koi Duub ke saahil kaa pataa detaa hai gham ki taufiq bhi sab ko nahin milti 'gauhar' ye vo neamat hai jo mushkil se khudaa detaa hai"

"ab salibein shaah-raahon par sajaa di jaaeingi aks rah jaaeinge tasvirein haTaa di jaaeingi baat karne ko taras jaaeinge arbaab-e-vafaa bandishein itni zabaanon par lagaa di jaaeingi jin kitaabon mein vafaa kaa zikr aaegaa nazar sabr kiije vo kitaabein bhi jalaa di jaaeingi aap aur tum kaa tasavvur bhi fanaa ho jaaegaa jitni qadrein hain adab ki sab miTaa di jaaeingi muntazir rahiye mohabbat kaa payambar aaegaa jitni shamein bujh chuki hain sab jalaa di jaaeingi pi rahe hain jin mein 'gauhar' log insaan kaa lahu aisi taamiron ki buniyaadein hilaa di jaaeingi"

"dil mein rahnaa kabhi khvaabon ke nagar mein rahnaa tum jahaan rahnaa mohabbat ke safar mein rahnaa khair-maqdam ke liye aaungaa main bhi ik din tum abhi silsila-e-shaam-o-sahar mein rahnaa vaqt samton ke taayyun ko badal saktaa hai tum mire saath mohabbat ke safar mein rahnaa moajiza ye bhi hai is daur ke fankaaron kaa aag se khelnaa aur mom ke ghar mein rahnaa fikr-e-shaair ke darichon se guzar kar dekho kitnaa dushvaar hai logon ki nazar mein rahnaa gharq hone se bache kitne safine 'gauhar' kaam aayaa miri kashti kaa bhanvar mein rahnaa"

"kabhi shaadmaan kabhi pur-alam tumhein yaad ho ki na yaad ho vo karam ke ruup mein ik sitam tumhein yaad ho ki na yaad ho vahi ahd-e-rasm-o-rah-e-vafaa vo dil-o-nazar kaa moaamla mujhe yaad hai mire mohtaram tumhein yaad ho ki na yaad ho vahi ghuncha ghuncha-o-gul-ba-gul vahi rukh-ba-rukh vahi dil-ba-dil kabhi the chaman ki bahaar ham tumhein yaad ho ho ki na yaad ho vo fusun-taraaz si ik nazar kabhi muntazir kabhi muntazir vo fasaana-saaz shab-e-alam tumhein yaad ho ki na yaad ho kabhi vo tabassum-e-zer-e-lab kabhi khaamushi si vo be-sabab kabhi sarkhushi kabhi aankh nam tumhein yaad ho ki na yaad ho"

"teri tasvir ko dhundlaa nahin hone deinge zindagi ham tujhe rusvaa nahin hone deinge sar pe har lamha raheinge tire aanchal ki tarah tu ghazal hai tujhe tanhaa nahin hone deinge jin makaanon se hai mansub khudaa ki azmat un makaanon mein andheraa nahin hone deinge jaan jaati hai chali jaae balaa se lekin ham mohabbat ko tamaashaa nahin hone deinge jin ko saae mein gunaahon ko panaahein mil jaaein un fasilon ko ab unchaa nahin hone deinge paar kar le jo qanaaat ki hadon ko 'gauhar' itnaa daaman ko kushaada nahin hone deinge"

"mizaaj-e-mustaqil denaa shuur-e-moatabar denaa jhukaa paae na jis ko vaqt kaa tufaan vo sar denaa mujhe umr-e-khizar denaa ki umr-e-mukhtasar denaa mire afkaar lekin zinda-e-jaaved kar denaa jo uTThe samt-e-maazi vo nazar meraa nahin haasil pas-e-divaar-e-mustaqbil jo dekhe vo nazar denaa mujaahid jang ke maidaan ko jaae jis tarah ghar se ye manzar zehn mein rakh kar mujhe izn-e-safar denaa agar is razm-gaah-e-dahr mein jiinaa hi hai mujh ko to phir in yurishon mein zinda rahne kaa hunar denaa sivaa ho jaae jis se azmat-e-dida-vari 'gauhar' nazar denaa to yaarab phir mujhe aisi nazar denaa"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"shab ki taarik raahdaari hai aur miraa khauf iztiraari hai sabz khvaabon ki kam se kam qimat zindagi bhar ki ashk-baari hai ik musallat-shuda tamaddun ko ye na kahiye ki ikhtiyaari hai shash-jihaati mushaahida hai miyaan tajrabon ki sanad pe bhaari hai shukriya aap ki mohabbat kaa dil kaa maqsum sogvaari hai tajziye sun ke muskuraa denaa apni itni hi zimmedaari hai"

"ye hai mai-kada yahaan rind hain yahaan sab kaa saaqi imaam hai ye haram nahin hai ai shaikh ji yahaan paarsaai haraam hai jo zaraa si pi ke bahak gayaa use mai-kade se nikaal do yahaan tang-nazar kaa guzar nahin yahaan ahl-e-zarf kaa kaam hai koi mast hai koi tishna-lab to kisi ke haath mein jaam hai magar is pe koi kare bhi kyaa ye to mai-kade kaa nizaam hai ye janaab-e-shaikh kaa falsafa hai 'ajib saare jahaan se jo vahaan piyo to halaal hai jo yahaan piyo to haraam hai tujhe apne husn kaa vaasta mere shauq-e-did pa rahm khaa zaraa muskuraa ke naqaab uThaa ki nazar ko shauq-e-salaam hai na sunnaa to huur o qusur ki ye hikaayatein mujhe vaa'izaa koi baat kar dar-e-yaar ki dar-e-yaar hi se to kaam hai na to e'tikaaf se kuchh gharaz na savaab-o-zuhd se vaasta tiri diid aisi namaaz hai na sujud hai na qayaam hai ye durust ki 'aib hai mai-kashi ye ba-jaa ki baada haraam hai magar ab savaal ye aa paDaa ki tumhaare haath mein jaam hai jo uThi to subh-e-davaam thi jo jhuki to shaam hi shaam thi tiri chashm-e-mast mein saaqiyaa miri zindagi kaa nizaam hai miraa farz hai ki paDaa rahun tiri baargaah mein saaqiyaa koi tishna-lab hai ki sair hai yahi dekhnaa tiraa kaam hai isi kaaenaat mein ai 'jigar' koi inqalaab uThegaa phir ki buland ho ke bhi aadmi abhi khvaahishon kaa ghulaam hai"