ham se bhali chaal chali chaandni — Bimal Krishn Ashk

"aise mein roz roz koi DhunDtaa mujhe aavaaz de rahi thi udhar ki havaa mujhe aisaa huaa ki ghar se na niklaa tamaam din jaise ki khud se aaj koi kaam thaa mujhe parde ke aas-paas koi baagh hi na ho khiDki khuli to phuul kaa dhokaa huaa mujhe ye peD jis pe phuul na patti na Tahniyaan das biis saal baad jo khud saa lagaa mujhe main aaj bhi vahi huun vafaa thi jise aziiz fursat mile to aa ke kabhi dekh jaa mujhe aankhon mein dil utar paDaa aaina dekh kar aayaa thaa ik khayaal bahut duur kaa mujhe ye fikr aa paDi hai ki badle gae na hon saae se kah rahaa huun zaraa dekhnaa mujhe kahte hain yaar-dost agar bevafaa kahein ai 'ashk' aansuon ne bhi kyaa de diyaa mujhe"

"agar tujh se huun to phir aur kyaa huun main kis jaisaa huun kis kis se judaa huun mujhe maalum hai kitnaa buraa huun ye kyaa kam hai ki apnaa aaina huun koi divaar si TuuTi hai shaayad main andar hi kahin girne lagaa huun kabhi to saamne aaungaa apne ki apni raah mein kab se khaDaa huun mujhe ehsaas ne gheraa huaa hai main apne-aap apnaa daaera huun ye meraa haath kis ke haath mein hai ye kis ke paanv hain jin par khaDaa huun mire alfaaz patthar ho gae hain main apne haath se zakhmi huaa huun khud apne-aap ko aavaaz de kar na jaane 'ashk' kis ko DhunDhtaa huun"

"kaise kahein ki chaar taraf daaera na thaa jaate kahaan ki khud se pare raastaa na thaa jab saans le rahi thi darakhton ke aas-paas aavaaz de rahi thi koi boltaa na thaa khud se chale to rah-guzar aaina ho gai apne sivaae aur koi sujhtaa na thaa ab ke basant aai to aankhein ujaD gaiin sarson ke khet mein koi patta haraa na thaa parda hilaa ke baad-e-sahar duur tak gai khushbu kidhar se aai kisi ko pataa na thaa guzri tamaam umr usi shahr mein jahaan vaaqif sabhi the go koi pahchaantaa na thaa ai 'ashk' ik kitaab paDhi thi varaq varaq vo tirgi thi lafz koi sujhtaa na thaa"

"charaagh jalne lagein aur dil machalne lage udhar ho raat udhar koi ji ko malne lage udaas os ki bundon se bujhne-jalne lage tum aa raho to sitaaron ki lau sambhalne lage ye devdaar ki Tahni pe tham gayaa saa chaand havaa chale to abhi karvaTein badalne lage tamaam-raat dhuaan saa uchhaalti rahi raat ruki to ThiThure hue haath-paaon jalne lage ab in hari-bhari saDkon kaa jaane kyaa hogaa thi jin se raah vahi raasta badalne lage jo baadalon mein tiri maang si lakiron par nazar gai to dilon mein charaagh jalne lage ruko to dard saa Thahraa sujhaai de dil mein chalo to 'ashk' kasak saath saath chalne lage"

"guzri raaton ke tasalsul se koi kyaa nikle ham jise teri tarah chaahein tujhi saa nikle jaise vo jaan nazar aankh jhapaktaa nikle raat ki kokh se aisaa koi taaraa nikle us pe kyaa jaaniye kyaa kyaa na guzarti hogi tum to ye soch rahe ho vo idhar aa nikle chup raho ik do-ghaDi ke liye rone vaalo ain mumkin hai koi hanstaa huaa aa nikle raah mein phuul khileinge to chubhan bhi hogi ghar mein baiThun to miri aankh kaa kaanTaa nikle raat jalti hai sulagte hue sahraa ki tarah dard agar ho to kisi aankh se dariyaa nikle"

"man mein jot jagaane vaale tyaag gae ye Deraa jogi uttar dakhkhin purab pachchhim chaaron or andheraa jogi dvaare dvaare alakh jagaane ko to saari 'umr paDi hai sej saji do chaar ghaDi ko kar le rain baseraa jogi is ghar mein ik koraa aanchal rote rote bhiig chalaa hai bhule hi se sahi kabhi to maar idhar bhi pheraa jogi apne man mein chor chhupaa ho to phir dosh kisi kaa kyaa hai vo hi raah-rau vo hi rahzan apnaa aap luTeraa jogi pal-do-pal ruk pahan gerue kapDe ham bhi saath chaleinge maar chali ras-bhari javaani jogi vaalaa pheraa jogi paanv paanv muDti pagDanDi aankh jhapakte Das leti hai jivan ki naagin kis ke bas is kaa kaun saperaa jogi tu jo kahe to un zulfon ki narm chhaaon hamraah le chalein jangal mein kaale baadal kaa saaya bahut ghaneraa jogi ye bhabhut kis ki palkon kis ke baalon ki parchhaain hai tere saaf saped jism par kis ne rang bikheraa jogi kaan mein kunDal kaDaa haath mein lambe baal ghunghrun vaale tere tan ke chaar chaphere kis jogan kaa gheraa jogi jis ne mujh ko ghar bakhshaa hai aur aavaara-gardi tujh ko us ki raahguzar kis ghar se kis raste par Deraa jogi har rukh par parchhaain kisi ki har chehre par 'aks kisi kaa chalte phirte baazaaron mein kyaa teraa kyaa meraa jogi is basti mein 'ashk' kisi ik laDke ko kunDal pahnaa kar ik laDki ne ye kah kar barbaad kiyaa tu meraa jogi"

"aap ki is adaa kaa kyaa kahnaa ghar jalaa kar vahin khaDe rahnaa chaand suraj havaa sabhi chup the phir achaanak se yuun havaa bahnaa kyaa hi shringaar tu karegi ab saadgi hai tiraa kharaa gahnaa"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"haalat-e-haal mein aadaab nahin bhultaa main khud ko bhulun bhi to ahbaab nahin bhultaa main main abhi ishq nahin haalat-e-imaan mein huun jang karte hue asbaab nahin bhultaa main jazb karti hui khilqat se mohabbat hai mujhe chaand ko chhoDiye taalaab nahin bhultaa main ai mujhe khvaab dikhaate hue logo sun lo meraa dukh ye hai koi khvaab nahin bhultaa main paarsaai nahin tanhaai mayassar thi vahaan so tire mimbar-o-mehraab nahin bhultaa main"

"vo nasha kab kisi sharaab mein hai jo khumaar aap ke shabaab mein hai chaand se kah do ab nikal aae meraa mahbub ab naqaab mein hai tujh ko chhu kar jo mujh tak aati hai vo mahak kab kisi gulaab mein hai paas aa kar tire huaa mahsus aisi ThanDak to maahtaab mein hai apne rukh se haTaaiye zulfein chaand kis vaaste sahaab mein hai"