havaa-e-gham hai magar aas-e-mo'jiza rakh ke — Arslan Abbas

"apne hisse mein 'ajab ranj-o-fughaan the jaanaan apne lamhaat-e-bahaaraan bhi khizaan the jaanaan tu ne dekhaa hi nahin dil ki nigah se varna sard aankhon mein sabhi zakhm ayaan the jaanaan ik tire hijr ki phaili hui rut se pahle ham kisi karb se maanus kahaan the jaanaan ye jo sargardaan hain galiyon mein udaasi ban kar ye kabhi shahr mein farhat kaa nishaan the jaanaan ab tire dar se pare duur khaDe sochte hain ham tire saath ke qaabil hi kahaan the jaanaan log kahte hain tire khvaab sajaane vaale tere 'abbaas' se pahle bhi yahaan the jaanaan"

"tire dar se nikalnaa yaad aaya musaafir dil ko ye kyaa yaad aaya achaanak kho gaiin maazi mein aankhein koi maanus chehra yaad aaya kisi aaghosh ki tahvil mein the sukun kaa ek lamha yaad aaya khudaa-naa-karda tum ko tanhaa chhoDun kisi lab kaa vazifa yaad aaya hamein 'abbaas' jis ko bhulnaa thaa vahi ham ko hamesha yaad aayaa"

"yuun baiThe rah ke sar-e-rahguzaar kyaa karnaa vo jaa chukaa hai to ab intizaar kyaa karnaa ye soch kar main tujhe haal-e-dil nahin kahtaa ki apne saath tujhe sogvaar kyaa karnaa agar ye farz hai to aa mu’aashre pe karein bas ek fard pe jaan ko nisaar kyaa karnaa mile hain dard to khush ho ke thaam lo yaaro ki raah-e-'ishq hai aah-o-pukaar kyaa karnaa mohabbaton kaa hadaf ruh-e-nur hai 'abbaas' badan to miTTi hai miTTi se pyaar kyaa karnaa"

"kuchh dinon se hansi ki zad mein hai dil-e-gham bebasi ki zad mein hai zindagi kaa tumhein bataaein kyaa zindagi zindagi ki zad mein hai pyaas si kyaa hai ye darun-e-jaan ruuh kis tishnagi ki zad mein hai muddaton se bahut udaas hai dil jaane ye kis kami ki zad mein hai chaaraagar aaj dil kaa haal na puchh aaj dil be-dili ki zad mein hai mujh ko mat ham-safar banaa ki miri zaat aavaargi ki zad mein hai ye miraa haal jo sanvartaa nahin ye tiri be-rukhi ki zad mein hai har kisi mein hai shor ik barpaa har koi khaamushi ki zad mein hai jaane ab kis tarah kaTe 'abbaas' zindagi rah-ravi ki zad mein hai"

"na ham-sukhan na koi ham-gumaan kidhar jaaein bahut udaas hain jaan-e-jahaan kidhar jaaein tire sivaa to koi rahnumaa nahin apnaa tu hi bataa ai gham-e-jaavedaan kidhar jaaein tumhaare naqsh se milte hain raaste saare miTaa ke dil se tumhaare nishaan kidhar jaaein ye teraa dar to hamein aakhiri Thikaana thaa yahaan se uTh ke tire be-makaan kidhar jaaein zamaana saaraa kharidaar-e-husn hai 'abbaas' ham apnaa le ke dil-e-raaegaan kidhar jaaein"

"sad-khataavaar hain lekin ye jasaarat nahin ki ham ne khush rah ke tire gham se khayaanat nahin ki ham ne be-sud tire saath mohabbat ki hai itni be-sud ki paane ki bhi chaahat nahin ki dil ko is sabr pe kuchh daad to de ki is ne tujh ko kho kar bhi miri jaan qayaamat nahin ki vo jahaan-zaad thaa us ne bhi sitam kam na kiye ham junun-zaad the ham ne bhi shikaayat nahin ki koi ik ghaav thaa jo she'r nahin ho paayaa koi ik choT thi jo dil ne 'ibaarat nahin ki vo jo ik chehra thaa aankhon kaa dilaasa 'abbaas' ham ne us chehre ki ‘umron se ziyaarat nahin ki"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"kisi ki mehrbaani ho gai hai ayaan dil ki kahaani ho gai hai hare mausam ki pahli khvaahishein uf khushi gham ki divaani ho gai hai sabhi afraad ghar ke so gae hain bahut lambi kahaani ho gai hai rivaayat kaa hai ab bhi sahar qaaem har ik jiddat puraani ho gai hai pas-e-chehra milaa ik aur chehra 'aqidat paani paani ho gai hai"

"aakhiri hal thaa yahi pesh-e-nazar jaane diyaa ek gahri saans li phir khvaab mar jaane diyaa saarbaanaa de gavaahi mujh ko pyaari thi anaa rakh liyaa zaad-e-safar aur ham-safar jaane diyaa hazrat-e-naaseh ki khush-uftaadgi pe daad hai khud jidhar se aae the sab ko udhar jaane diyaa is harim-e-naaz mein yuun be-mahaabaa guftugu kuchh bharam rakkhaa to hotaa tum ko gar jaane diyaa tujh ko rokaa jaa rahaa thaa raushni thi jab talak shaam ke Dhalte samay suraj ko ghar jaane diyaa aankh sapne dekhti thi aansuon se kyon bhari chaahti to puchh leti main magar jaane diyaa dostaa qismat na ho to koshishein bekaar hain sabr kaa paimaana ham ne khud hi bhar jaane diyaa dil musir thaa baarhaa kuchh jaanchne ko ruk gae aakhirash us ne hamein baar-e-digar jaane diyaa"