ishq main ne likh Daalaa qaumiyat ke khaane mein — Amir Ameer

"tiri hi shakl ke but hain kai taraashe hue na puchh kaaba-e-dil mein bhi kyaa tamaashe hue hamaari laash ko maidaan-e-ishq mein pahchaan bujhi hui si hain aankhein to dil kharaashe hue ba-vaqt-e-vasl koi baat bhi na ki ham ne zabaan thi sukhi hui honT irtiaashe hue vo kaise baat ko toleinge aur boleinge jo pal mein tole hue aur pal mein maashe hue mazaaq chhoD bataa ye ki mujh se kyaa parda tire nuqush hain saare mire talaashe hue main tere shahr se niklaa thaa ain us lamha tire nikaah pe taqsim jab bataashe hue"

"na ghaur se dekh mere dil kaa kabaaD aise ki main kabhi bhi nahin rahaa thaa ujaaD aise buraa ho teraa jo band rakhe the main ne ghar ke to khol aayaa baghair puchhe kivaaD aise jo meri ruh-o-badan ke Taanke udheD Daale to meri nazron pe apni nazron ko gaaD aise samajh na paayaa ki toD detaa yaa saath rakhtaa ki is taalluq mein aa gai thi daraaD aise ai ishq! rah jaaun phaDphaDaa ke yuun kar de be-bas so meri gardan mein apne daanton ko gaaD aise to meri aadat se meri fitrat hi ho chalaa hai abhi bhi kahtaa huun mujh ko tu na bigaaD aise ye mere baazu hi jang kaa faisla kareinge pakaD le talvaar aur mujh ko pachhaaD aise tumhaare gham kaa pahaaD TuuTaa to phir ye jaanaa pahaaDon par hi to TuTte hain pahaaD aise hazaar minnat hazaar minnat hazaar mehnat tujhe manaane ko kar rahaa huun jugaaD aise"

"pyaar ki har ik rasm ki jo matruk thi main ne jaari ki ishq-labaada tan par pahnaa aur mohabbat taari ki main ab shahr-e-ishq mein kuchh qaanun banaane vaalaa huun ab us us ki khair nahin hai jis jis ne ghaddaari ki pahle thoDi bahut mohabbat ki ki kaisi hoti hai par jab asli chehra dekhaa main ne to phir saari ki jo bhi muD kar dekhegaa vo patthar kaa ho jaaegaa dekho dekho shahr mein aae sannaaTaa aur taariki ek janam mein main us kaa thaa ek janm mein vo meraa ham ne ki har baar mohabbat lekin baari baari ki ham saa ho to saamne aae aadil aur insaaf-pasand dushman ko bhi khuun rulaayaa yaaron se bhi yaari ki aisaa pyaar thaa ham donon mein ki barson laa-ilm rahe us ne bhi kirdaar nibhaayaa main ne bhi fankaari ki baat to itni si hai vaapas jaane ko main aayaa thaa saans uThaai umr sameTi chalne ki tayyaari ki"

"tasvir teri yuun hi rahe kaash jeb mein goyaa ki husn-e-vaadi-e-kailaash jeb mein raste mein mujh ko mil gayaa yuun hi giraa-paDaa main ne uThaa ke rakh liyaa aakaash jeb mein pandrah minute se DhunD rahaa hai na jaane kyaa Daale hue hai haath ko qallaash jeb mein aa jaa ki yaar paan ke khokhe pe jama hain cigarette chhupaa ke haath mein aur taash jeb sab tent aur kursiyon vaale kamaa gae shaair ne Thuns kar bhari shaabaash jeb mein ab us gharib chor ko bhejoge jail kyuun ghurbat ki jis ne kaaT li paadaash jeb mein rakhtaa nahin huun paas mein apni kabhi shanaakht phirtaa hai kaun le ke kabhi laash jeb mein"

"ye meraa aks jo Thahraa tiri nigaah mein hai nahin hai pyaar to phir kyaa tiri salaah mein hai nahin hai vaqt ki jurat ki chhu sake us ko ye teraa husn ki jab tak miri panaah mein hai nazar jo tujh pe ruke to zaraa nahin sunti kahaan savaab mein hai ye kahaan gunaah mein hai zabaan sambhaal ke ab naam le raqib us kaa jo teraa pyaar thaa vo ab mire nikaah mein hai"

"miri divaangi khud saakhta naiin main jaisaa huun main vaisaa chaahtaa naiin sukun chehre kaa tere kah rahaa hai ki ai dushman tu mujh ko jaantaa naiin ye dil gustaakh hotaa jaa rahaa hai ki suntaa hai miri par maantaa naiin mujhe Dar hai mohabbat mein agar vo kahin kah de khudaa-na-khaasta naiin agarche dil kahin par haar aayaa magar phir bhi main dil-ardaashta naiin 'amir' is ishq kaa mujh se na puchho pata tum sab ko hai kis ko pata naiin"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"