jhuTi baaton se bahlaa kar lauT gayaa — Pushpendra Pushp

"farebi ziist ke nakhre uThaa kar thakan hone lagi khud se nibhaa kar anaa meri mujhe jhukne na degi zamaana thak gayaa hai aazmaa kar kisi bhi taur jo jiitaa na jaae use tum jiit lenaa muskuraa kar hazaaron khvaab Thukraae hain main ne tumhaare hijr mein nindein ganvaa kar zaraa si choT par rone se pahle kabhi to dard duniyaa ke ginaa kar ghazab manzar thaa pahle ruThnaa phir tumhaaraa khuub hansnaa khilkhilaa kar kisi ko raaste chhalte rahe hain kisi ko manzilein laain bulaa kar kabhi imdaad bhijvaane se pahle hamaare aansuon se mashvara kar tire ehsaan se dil bhar gayaa hai kahaan rakh luun main tere gham chhupaa kar vo shaa'ir the magar meDal unhein bhi mile hain raag darbaari sunaa kar ghazal hogi ravaani mein tabhi jab likhoge dard meraa gungunaa kar"

"mohabbat mein hazaaron imtihaan the magar ye baat ham samjhe kahaan the kahin chhupnaa munaasib hi na thaa so main in mein aur vo mujh mein nihaan the huaa ye 'ilm duniyaa ki hansi se hamaare raaz to saare 'ayaan the samay badlaa nazar badli sabhi ki vahi jo ab se pahle qadr-daan the kahaan alfaaz ki narmi ganvaa di qasam se aap to shirin-zabaan the"

"jise main apni jaanib maantaa thaa vo apne aap mein hi mubtalaa thaa baDi hairat huaa karti hai mujh ko use le kar main kyaa kyaa sochtaa thaa ghazab ki be-khudi taari thi mujh par main apne aap ko bhulaa huaa thaa tumhein kyaa DhunDhtaa us daur mein jab main khud se hi bichhaD kar rah gayaa thaa nazaare aankh mein simTe hue the samundar duur tak phailaa huaa thaa bhale hi aagahi soti rahi thi magar main 'umr-bhar jaagaa huaa thaa"

"khizaan ho zalzala ho yaa bhanvar ho mire jazbaat kaa kuchh to asar ho hamein bhi le chalo aisi Dagar par jahaan se chand khushiyon kaa guzar ho milan jis mein judaai tak na pahunche fasaana is qadar bhi mukhtasar ho kabhi to tazkira meraa bhi nikle mire haalaat ki us ko khabar ho kami koi na rakhnaa kaavishon mein natije mein bhale haasil sifar ho"

"khel jab hone lage taqdir kaa zor chaltaa hi nahin tadbir kaa jab nishaanaa ho nigaah-e-tir kaa kaam kyaa hai phir bhalaa shamshir kaa ek pahlu hai dil-e-be-pir kaa ek pahlu hai tiri tasvir kaa khuun ke pyaase gale mil kar gae chal gayaa sikka miri taqrir kaa dil samajhtaa hai nigaahon ki zabaan kyaa karun main aap ki tahrir kaa zulm sadiyon se pareshaan hai magar silsila TuuTaa na raanjhaa hiir kaa"

"dikhne mein goyaa hamsaae rahte hain andar se kuchh log paraae rahte hain murat saa rang-rup banaae rahte hain sirat mein shaitaan basaae rahte hain chehre par muskaan ugaae rahte hain lekin dil mein sang chhupaae rahte hain himmat kar ke haal-e-dil kahne vaale kah kar bhi kitnaa sharmaae rahte hain unchaai par jaane vaale vaise hi girne se har pal ghabraae rahte hain din mein dekhaa khvaab faqat khush-fahmi hai phir bhi ham dil ko bharmaae rahte hain"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"kal shab dil-e-aavaara ko siine se nikaalaa ye aakhiri kaafir bhi madine se nikaalaa ye fauj nikalti thi kahaan khaana-e-dil se yaadon ko nihaayat hi qarine se nikaalaa main khuun bahaa kar bhi huaa baagh mein rusvaa us gul ne magar kaam pasine se nikaalaa Thahre hain zar-o-sim ke haqdaar tamaashaai aur maar-e-siyah ham ne dafine se nikaalaa ye soch ke saahil pe safar khatm na ho jaae baahar na kabhi paanv safine se nikaalaa"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"