kal khud mujhe rusvaa sar-e-baazaar karoge — Basheer Ahmad Basheer

"vajh-e-khalish hai baa’is-e-aasudgi bhi hai ye bo'd jis mein lazzat-e-hamsaaegi bhi hai kuchh dasht ke bagule bhi hain baa'is-e-fishaar kuchh khud mizaaj-e-khaak mein aavaargi bhi hai basti koi 'ajib hai ye is jagah ke log khanda-ba-lab hain chehron pe aazurdagi bhi hai vaise bhi kuchh yahaan se tabi'at hai ab uchaaT yuun dil ko is dayaar se vaabastagi bhi hai is apni gosha-giri ke hain aur bhi sabab ik vajh past-himmaton ki khvaajgi bhi hai vo aatishin kurah hai ye dil jis ke har taraf taariki-e-khalaa bhi hai yakh-bastagi bhi hai phir mujh se qaum karti hai kyon mo'jize talab jab taa’n-e-sehr-o-tohmat-e-divaangi bhi hai maujudgi tiri muta’ayyan na ho saki ai tu ki har jagah tiri maujudgi bhi hai kyaa kijiye 'bashir' shu'ur-e-anaa ke saath hukm-e-sujud-o-'aajizi-o-bandagi bhi hai"

"har chand tere shahr ke ab kucha-gard hain lekin is apne daur mein ham log fard hain samjhe nahin zabaan ghazaalon ki aaj tak ham bhi jo ek 'umr se sahraa-navard hain guzre hain ham bhi pech-o-kham-e-raah-e-zist se yaa'ni ki ham bhi vaaqif-e-har-garm-o-sard hain kyaa kyaa hain ikhtiyaar-o-iraada ki tohmatein ham par bisaat-e-jabr ki jo ek nard hain jis se gudaaz-o-garm zamir-e-vajud hai ham sina-e-hayaat ki vo aah-e-sard hain dekhaa hai aaj ham ne bhi jaa kar 'bashir' ko be-shak abhi zamaane mein kuchh ahl-e-dard hain"

"kaisi kaisi thiin unhi galiyon mein zebaa suratein yaad ik ik moD pe aati hain kyaa kyaa suratein nim-shab hote hain vaa jis dam dariche yaad ke kis adaa se jhaankti hain ab vo raaanaa suratein suratein kuchh dekh kar aisaa bhi aataa thaa khayaal khaak se aisi kahaan hoti hain paidaa suratein luuT kar pahle-pahal aae the jab us shahr se ajnabi lagti thiin aankhon ko shanaasaa suratein aaj tak vo dil ki divaaron pe kanda hain 'bashir' phir nazar aaein nahin jo maah-simaa suratein"

"in chaTakhte pattharon par paanv dharnaa dhyaan se Dhal chuki hai shaam vaadi mein utarnaa dhyaan se jaamid-o-saakit sahi divaar-o-dar bahre nahin ghar ki tanhaai ho phir bhi baat karnaa dhyaan se kaan mat dharnaa kisi aavaaz par kaisi bhi ho koi roke bhi to raste mein Thaharnaa dhyaan se dekhnaa saaya kahin koi taaaqub mein na ho shahr ki viraan galiyon se guzarnaa dhyaan se raah mein dekho koi manzar to rakhnaa zehn mein phir kahin fursat mile to rang bharnaa dhyaan se kitne suraj tum se pahle is safar mein jal-bujhe is jahaan-e-tira-khaatir par ubharnaa dhyaan se vaqt ke saath apne andaaze ghalat nikle 'bashir' kis qadar mushkil hai pyaaron kaa utarnaa dhyaan se"

"har gaam pe aavaargi-o-dar-ba-dari mein ik dhyaan kaa saaya hai miri ham-safari mein taa-hadd-e-nazar pighli hui ret kaa dariyaa kis samt nikal aae hain ye be-khabari mein kis ki tarab-andaaz-nazar ghol rahi hai andoh-o-gham-o-soz mizaaj-e-bashari mein kyaa koi kahin kunj-e-khayaabaan-e-sukun hai ai dasht-e-gham-e-zist tiri be-shajari mein ai qarya-e-dil dekh guzarti hai isi taur har shahr pe barbaadi-o-zer-o-zabari mein ahl-e-talab-o-shauq zamaanon se paDe hain arsa-gah-e-khud-sozi-o-hairaan-nazari mein lahraae na lahraae vo ab barq-e-khad-o-khaal ab ham nahin khaar-e-khas-e-aashufta-sari mein ik hamdam-e-derina ki yaadon ki kasak hai khushbu-e-khush-anfaasi-e-baad-e-sahari mein nigaraan miri jaanib nigah-e-khush-hunraan hai kuchh to hunar aakhir hai miri be-hunari mein ik tesha-e-sad-paara ki surat hain 'bashir' ab haasil yad-e-tula thaa jinhein shisha-gari mein"

"giraft-e-zist mein huun qaid-e-be-hisaar mein huun azaab-e-arsa-gah-e-jabr-o-ikhtiyaar mein huun khayaal hai to abhi DhunDh phir milun na milun abhi main tere uDaae hue ghubaar mein huun bhaDak rahaa hai badan ruuh ko khabar bhi nahin ye kyaa maqaam hai ye kaise shoala-zaar mein huun main kaun huun tire nazdik ye savaal nahin hubaab huun ki sadaf bahar-e-be-kanaar mein huun khud apne aap se har dam huun barsar-e-paikaar main apni zaat ke maidaan-e-kaar-zaar mein huun mein bhed kyaa tujhe duun be-karaan khalaaon ke ki main azal se isi halqa-e-madaar mein huun talaash kis ki hai mujh ko abhi ye kyaa sochun 'bashir' abhi to main apne hi intizaar mein huun"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"