khudaa thaa muntazir ik aadmi kaa — Qais Rampuri

"zaaviya honTon kaa vo dilkash banaataa kis tarah ruuh zakhmida bahut thi muskuraataa kis tarah ungliyaan bhi quvvat-e-binaai rakhti hain bahut main kisi ke jism ko ye sach bataataa kis tarah kal mire bachche bhi aa sakte hain khushbu ke liye shahr-e-gul mein zahr ke kaanTe bichhaataa kis tarah fan ki daulat baDh gai to dil ke TukDe ho gae main samundar ban gayaa to ghar bachaataa kis tarah main huun ik patthar magar dast-e-hunar mein rah gayaa shish-mahlon ki hai qismat kyaa bataataa kis tarah"

"ek shab mein kamre kaa ruup Dhal gayaa kaise vo to giili lakDi thaa raat jal gayaa kaise ek-tarfa chaahat bhi kaisaa dard hoti hai main huun aaj tak patthar vo badal gayaa kaise kal tamaam basti mein sail-e-khun bahaa lekin ek sar-phiraa qaatil kal sanbhal gayaa kaise vo zamin-zaadon ki khun-kashi kaa 'aadi thaa aaj apnaa khuun pi kar dam nikal gayaa kaise chaand ki haqiqat ko khuub jaantaa huun main phir bhi chaand-raaton kaa jaadu chal gayaa kaise"

"fasil-e-shahr se niklo bhalaa isi mein hai ki zalzalon ki hukumat gali gali mein hai diyaa kahin bhi jalaanaa mujhe khabar karnaa mire lahu kaa ujaalaa bhi raushni mein hai vo muskuraa ke khudaa kaa pataa bataataa hai na jaane kaun saa jaadu us aadmi mein hai chalaa huun maut ke paikar ko qatl karne magar ye vasf-e-khaas to khud meri zindagi mein hai dariche apne khule rakhnaa shab ke pichhle pahar sunaa hai 'ishq kaa andaaz chaandni mein hai"

"jo chand log mire she'r sun ke jaate hain tilism-e-hosh-rubaa paDhne baiTh jaate hain masarraton ko samajhne ki kaisi rut aai sagaan-e-shahr bhi ab qahqahe lagaate hain libaas maang ke pahnaa hai kuchh rafiqon ne aur us pe lutf mujhe aaina dikhaate hain vahi bataaeinge tanhaa shabon ki me'raajein jo apni zaat ke madfan mein Duub jaate hain har ek lamha kasi jaa rahi hain zanjirein 'ajab ghulaam hain ham phir bhi muskuraate hain na-jaane kaun mujhe yaad kar ke royaa 'qais' havaa ke dosh pe ashkon ke jaam aate hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"nahin piitaa main par navaazish hui hai baDi mausamon ki sifaarish hui hai bahut din se sahraa ke jaisaa ye dil hai na baadal ghire hain na baarish hui hai yahaan hai bulandi jo kirdaar ki to vahaan khaal-o-khad ki numaaish hui hai tiri jhiil jaisi jo dekhi hain aankhein miri Duub jaane ki khvaahish hui hai chhalaktaa nahin khuun zakhmon se aise kahin naakhunon ki bhi kaavish hui hai hamein 'ishq mein mubtalaa kar rahe hain nazar aur dil mein ye saazish hui hai vahaan dushmanon ki baDi yaad aai jahaan doston ki navaazish hui hai vafaa-daariyon kaa sila mil rahaa hai hamaari sadaa aazmaaish hui hai pareshaaniyon mein jo ham mubtalaa hain yaqinan koi ham se laghzish hui hai vahin apni aankhon ko ham chhoD aae jahaan manzaron ki numaaish hui hai raqibon ko hai chhuT mahfil mein un ki mire aane jaane pe bandish hui hai ghazal kahnaa 'faaruq' main chhoD dungaa isi baat par un se ranjish hui hai"

"jab se aayaa huun tere gaanv mein rang hi rang hain fazaaon mein aa ki dukh sukh ki koi baat karein baiTh kar shishamon ki chhaanv mein main bhi kartaa huun zabt ki koshish to bhi takhfif kar adaaon mein vo tiraa dafatan bichhaD jaanaa vo miraa dekhnaa khalaaon mein ho agar koi gosh-bar-aavaaz ik khamoshi bhi hai sadaaon mein yahi mere liye ghanimat hai saans le luun khuli fazaaon mein"

"bas ki ik lams ki ummid pe vaare hue hain so tire saamne ye khaak pasaare hue hain jaane kab un ko bujhaa baiThe koi baad-e-alam sar-e-mizhgaan-e-tamannaa jo sitaare hue hain zindagi tu bhi hamein vaise hi ik roz guzaar jis tarah ham tujhe barson se guzaare hue hain nit-nae naqsh karein us pe aziyyat ke raqam aa ki ham takhti-e-dil apni pachaare hue hain kab kuchal jaaein kisi paanv se ham barg-e-vajud vaqt ki dhuup mein vaise hi karaare hue hain jaante hain ki tu hi ishq-badan ko hai libaas ham tiraa ruup jo aashuftagi dhaare hue hain apni jurat ki sataaish ho ki ham chob-mizaaj rabt rakhte hain sadaa un se jo aare hue hain"

"phir bahaar aai hai phir josh mein saudaa hogaa zakhm-e-derinaa se phir khuun Tapaktaa hogaa biiti baaton ke vo naasur hare phir honge baat niklegi to phir baat ko rakhnaa hogaa yurishein kar ke umanD aaeingi suuni shaamein laakh bhaTkein kisi unvaan na saveraa hogaa ji ko samjhaaeinge matvaali havaa ke jhonke phir koi laakh sambhaale na sambhalnaa hogaa kaisi rut aai havaa chalti hai ji Doltaa hai ab to hansnaa bhi taDapne kaa bahaanaa hogaa TuuT jaaegaa ye laachaari-e-daaem kaa fusun aur is tarah ki jaise koi aataa hogaa dil dhaDakne ki sadaa aaegi sune-pan mein duur baadal kahin parbat pe garajtaa hogaa"