kisi se ishq miraa vaalihaana hote hue — Aatish Raza

"nazar mein kuchh na thi pahle kabhi tauqir miTTi ki farishte dang hain ab dekh ke taqdir miTTi ki hazaaron neamatein deti hain lekin zarb sah sah kar khudaa ne bhi banaai hai ajab taqdir miTTi ki sunaai degi zaalim tujh ko tab majbur ki aahein jakaD legi tire pairon ko jab zanjir miTTi ki ki jaise peD ki har shaakh mujh se baat karti hai ki jaise dekhtaa rahtaa huun main taasir miTTi ki imaarat koh-o-sahraa peD dariyaa aadmi saare zamin par basne vaale hain magar jaagir miTTi ki tiri puujaa kareinge log ik din dekhnaa 'aatish' banaa kar us ne rakkhi hai tiri tasvir miTTi ki"

"kahin pe dhuup kahin par hain saaebaan bahut qadam qadam pe hain duniyaa mein imtihaan bahut mujhe sipurd to logon ne kar diyaa us ke magar aziiz hai qaatil ko meri jaan bahut agar ye chaahe to ik pal mein inqalaab aae hamaari qaum mein aise hain naujavaan bahut magar daraaD na aane di main ne rishte mein bhare hain logon ne vaise to mere kaan bahut ye dukh hai us ko na shabnam-fishaaniyaan samjho zamin ke haal pe royaa hai aasmaan bahut"

"tumhaare tanz kaa har ek tiir zinda hai ki khaa ke zakhm dil-e-be-zamir zinda hai mujhe kharidne vaalaa ye kah ke lauT gayaa ajiib shakhs hai ab tak zamir-zinda hai sunaai deti hai zanjir ki sadaa aksar hamaari zaat mein shaayad asiir zinda hai hamaaraa ahd Dhalegaa hamaare sheron mein hamaari soch ki jab tak lakir zinda hai uThaa ke dekh lo koi ghazal miri 'aatish' har ek fikr miri be-nazir zinda hai"

"hasin rukh pe abhi tum naqaab rahne do na kholo band ghazal ki kitaab rahne do uThungaa dekhnaa ik din main aandhiyon ki tarah abhi karo na savaal-o-javaab rahne do ham apnaa farz kisi roz bhuul baiThein naa hamaare kaandhon pe kumbe kaa daab rahne do har ek chiiz ki mujh mein tamiz hai bhaai tum apne paas azaab-o-savaab rahne do main apni pyaas ko sahraa-navard kar dungaa miTaa do saare samundar saraab rahne do tumhaare vaaste saaya azaab hai 'aatish' tum apne sar pe khaDaa aaftaab rahne do"

"maut insaan ke jiine kaa badal hoti hai zindagaani mein hi poshida ajal hoti hai ai mire kaatib-e-taqdir zaraa ye to bataa teri tahrir bhi kyaa radd-o-badal hoti hai tum agar chaaho to vo khuun bhi de saktaa hai ek mazlum ki har baat aTal hoti hai sher-goi ki aziyyat bhi aziyyat hai ajiib quvvat-e-fikr har ik sher pe shal hoti hai khuun jaltaa hai mire jism kaa pahle 'aatish' tab kahin jaa ke miri ek ghazal hoti hai"

"phuul achchhaa nahin lagtaa hai chaman se baahar bad-nasibi hamein le aai vatan se baahar ek bhi shakhs agar ho to bataa do mujh ko kaun is daur mein hai ranj-o-mehan se baahar zar-parasto kabhi sochaa bhi hai ki kyon aakhir haath rakkhe the sikandar ke kafan se baahar chand sikke nahin milti hai aziyyat phir bhi log aksar chale jaate hain vatan se baahar ab ye basti bhi hui jaati hai viraan 'aatish' sochtaa huun ki nikal jaaun badan se baahar"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"