lab apne aaina jab kholtaa hai — Ahteramulhaque Siddiqui Sharar

"shab ke sannaaTon se jab ghabraa gai khaali saDak ghup andheron se lipaT kar ro paDi kaali saDak raundte hain log us ko roz qadmon mein magar sabr karti hai nahin deti kabhi gaali saDak sard raaton ko ThiThur kar kaaT deti hai gharib garmiyon mein jhelti hai dhuup ki laali saDak jis musaafir kaa nahin hotaa koi bhi ham-safar manzilon tak chhoD aati hai use kaali saDak koi apnaa ho paraayaa ho hai sab par mehrbaan sab ke nakhre jhelti hai kitni dil vaali saDak log so jaate hain jab shab ki siyaahi oDh kar raat bhar tanhaa kiyaa karti hai rakhvaali saDak aise aise bhi siyaasat-daan hain mere 'ahd mein maal to khud khaa gae kaaghaz pe banvaa li saDak qaumi yak-jehti ki jiiti jaagti hai ik misaal 'iid ke din 'iid divaali pe divaali saDak gaanv ki pagDanDiyon se shaah-raahon tak 'sharar' qaafila-saalaar main huun qaafila khaali saDak"

"har samt qahqahon ki ramaq chhoD jaaungaa chehra gham-e-hayaat kaa faq chhoD jaaungaa rah rah ke log mujh ko paDheinge varaq varaq main tajrabaat ke vo sabaq chhoD jaaungaa aain-e-zindagi ko murattab kiyaa agar mafhum-e-zindagi ko adaq chhoD jaaungaa jis roz toD dungaa badan ke hisaar ko hanste hue dilon mein qalaq chhoD jaaungaa is tarh bund-bund bahungaa Thahar-Thahar kan kan mein apne khuun ki ramaq chhoD jaaungaa dohraaungaa kabhi jo kitaab-e-hayaat ko daanista talkhiyon ke varaq chhoD jaaungaa chamkungaa aaftaab ke maanind main 'sharar' jab Dubne lagungaa shafaq chhoD jaaungaa"

"vaa'da kar ke har vaa'de ko vaa'don par mat Taalaa kar maanaa kam fursat hai tujh ko phir bhi vaqt nikaalaa kar ye patthar vo bhi ik patthar yahaan vahaan patthar hi patthar tu shisha hai soch samajh kar ghar se paaon nikaalaa kar pyaas bahut hai pi lene de madiraa nain kaToron se khol dariche in palkon ke raushan ye madhushaalaa kar khvaab hai tu bhi zakhm hi degaa kyaa tujh se ummid karun chhoD mujhe ai paapi sapne jaa apnaa munh kaalaa kar pyaar mohabbat qasmein vaa'de sab zahrile bandhan hain ye Das leinge tan-man pagli aise naag na paalaa kar apnaa dil ik paagal panchhi is kaa Thor-Thikaana kyaa is ke pairon mein rishton ki zanjirein mat Daalaa kar laffaazi ik gorakh-dhandaa pal do pal kaa khel 'sharar' anmiT naqsh banaa jazbon ko tahriron mein Dhaalaa kar"

"main ne jise shu'ur diyaa mohtaram kiyaa us shakhs ne hi baDh ke miraa sar qalam kiyaa kuchh us ke haath meri pahunch se buland the kuchh vaqt ne miraa qad-o-qaamat bhi kam kiyaa phir kirchiyon ki shakl mein bikhraa hasin khvaab phir ik malaal ne miri aankhon ko nam kiyaa nur-e-shafaq ki main bhi thaa pahli kiran magar teri 'inaayaton ne mujhe shaam-e-gham kiyaa main kaanch ke gilaas ke maanind thaa 'sharar' us ne labon se chhu ke mujhe jaam-e-jam kiyaa"

"bilaa-sabab jhiDkiyaan sunaa kar mizaaj ke bal nikaalti hain ra'unatein tab kisi ke kaase mein koi sikka uchhaalti hain na ab vo sabr-o-razaa ke paikar na ab vo shaidaai raah-e-haq ke na bhuke bachchon mein vo qanaa'at na maaein patthar ubaalti hain taDap uThe hai shu'ur-e-bismil karaahtaa hai dhuaan dhuaan dil khamoshiyaan jab samaa'aton ki ragon pe tezaab Daalti hain havaaein rahmat ki gar chalein to naved laati hain raahaton ki yahi havaaein ghazab mein aaein to khaak chehron pe Daalti hain kabhi sakhaavat kabhi shaqaavat kabhi mohabbat kabhi 'adaavat siyaasatein hasb-e-haal aksar naqaab chehron pe Daalti hain kisi ko teshe pe naaz apne kisi kaa takiya samundaron par magar hamaari to eDiyaan hi zamin se paani nikaalti hain rivaayatein shauq mein numaaish ke ho gaiin be-hijaab lekin sharaafatein aaj bhi darichon pe TaaT ke parde Daalti hain varaq varaq kyon 'sharar' musalsal tum us nazar ke hisaar mein ho vo shokh aankhein phaTi puraani kitaab mein kyaa khangaalti hain"

"ta'alluq ko ghalat-andaaz mat de qarib aa duur se aavaaz mat de bahut khud-sar hai musht-e-khaak yaa-rab use jaah-o-hasham e'zaaz mat de main thak kar chuur huun chhune de manzil mujhe ai zindagi aavaaz mat de koi sun legaa dil ki baat paagal labon ko dhaDkanon kaa raaz mat de miri sab ungliyaan hain zakhm-khurda mire haathon mein koi saaz mat de jahaan pahunchegaa jaageinge sharaare 'sharar' ko khaslat-e-parvaaz mat de"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"shab ki taarik raahdaari hai aur miraa khauf iztiraari hai sabz khvaabon ki kam se kam qimat zindagi bhar ki ashk-baari hai ik musallat-shuda tamaddun ko ye na kahiye ki ikhtiyaari hai shash-jihaati mushaahida hai miyaan tajrabon ki sanad pe bhaari hai shukriya aap ki mohabbat kaa dil kaa maqsum sogvaari hai tajziye sun ke muskuraa denaa apni itni hi zimmedaari hai"

"ye hai mai-kada yahaan rind hain yahaan sab kaa saaqi imaam hai ye haram nahin hai ai shaikh ji yahaan paarsaai haraam hai jo zaraa si pi ke bahak gayaa use mai-kade se nikaal do yahaan tang-nazar kaa guzar nahin yahaan ahl-e-zarf kaa kaam hai koi mast hai koi tishna-lab to kisi ke haath mein jaam hai magar is pe koi kare bhi kyaa ye to mai-kade kaa nizaam hai ye janaab-e-shaikh kaa falsafa hai 'ajib saare jahaan se jo vahaan piyo to halaal hai jo yahaan piyo to haraam hai tujhe apne husn kaa vaasta mere shauq-e-did pa rahm khaa zaraa muskuraa ke naqaab uThaa ki nazar ko shauq-e-salaam hai na sunnaa to huur o qusur ki ye hikaayatein mujhe vaa'izaa koi baat kar dar-e-yaar ki dar-e-yaar hi se to kaam hai na to e'tikaaf se kuchh gharaz na savaab-o-zuhd se vaasta tiri diid aisi namaaz hai na sujud hai na qayaam hai ye durust ki 'aib hai mai-kashi ye ba-jaa ki baada haraam hai magar ab savaal ye aa paDaa ki tumhaare haath mein jaam hai jo uThi to subh-e-davaam thi jo jhuki to shaam hi shaam thi tiri chashm-e-mast mein saaqiyaa miri zindagi kaa nizaam hai miraa farz hai ki paDaa rahun tiri baargaah mein saaqiyaa koi tishna-lab hai ki sair hai yahi dekhnaa tiraa kaam hai isi kaaenaat mein ai 'jigar' koi inqalaab uThegaa phir ki buland ho ke bhi aadmi abhi khvaahishon kaa ghulaam hai"