pahle hi baar-e-dosh hain sar bhi gae to kyaa — Hasan Abidi

"tishna-kaamon ko yahaan kaun subu detaa hai gul ko bhi haath lagaao to lahu detaa hai neshtar aur sahi kaar-e-digar aur sahi dil-e-sad-chaak agar izn-e-rafu detaa hai taab-e-fariyaad bhi de lazzat-e-bedaad bhi de dene vaale jo mujhe soz-e-gulu detaa hai ham to barbaad hue barg-e-khizaan ki surat shaakh-e-gul kaun tujhe zauq-e-numu detaa hai munsifo haath se ab dashna-o-khanjar rakh do kyaa buraa hai agar insaaf adu detaa hai ai khudaavand mire sher ki qimat kyaa hai ek roTi kaa nivaala jise tu detaa hai"

"ham tirgi mein sham' jalaae hue to hain haathon mein surkh jaam uThaae hue to hain us jaan-e-anjuman ke liye be-qaraar dil aankhon mein intizaar sajaae hue to hain milaad ho ki majlis-e-gham mubtalaa tire aangan mein dil ke farsh bichhaae hue to hain hizb-e-haram ne shauq-e-junun ko baDhaa diyaa siine se ham buton ko lagaae hue to hain duniyaa kahaan thi paas-e-viraasat ke zimn mein ik diin thaa so us pe luTaae hue to hain kab chobdaar par hon sar-afraaz dekhiye us shokh ki nigaah mein aae hue to hain"

"safar mein ek jag tamaam ho gayaa ab apne ghar kaa raasta bhi kho gayaa phir us ke pairahan ki bu na mil saki vo mere khuun mein aastin Dubo gayaa vo neshtar jo us ke haath mein na thaa gayaa to meri saans mein piro gayaa ab aansuon ki fasl kaaTte raho judaaiyon ke biij vo to bo gayaa na jaane kis nagar aaj shaam ho sahar hui to ji udaas ho gayaa guzar gai jo be-gharon pe kyaa kahein zamin ko abr-e-barshgaal dho gayaa miri to aankh nam na ho saki magar vo mujh pe mere aansuon se ro gayaa likhegaa kaun is sadi ki daastaan har ek pal hazaar saal ho gayaa"

"shahr-e-naa-pursaan mein kuchh apnaa pata miltaa nahin baam-o-dar raushan hain lekin raasta miltaa nahin fasl-e-gul aisi ki arzaan ho gae kaaghaz ke phuul ab koi gul-pairahan zarrin-qabaa miltaa nahin aashnaa chehron se rang-e-aashnaai uD gayaa ham-zabaan ab khushk patton ke sivaa miltaa nahin ek sannaaTaa hai shabnam se shuaa-e-nur tak ab koi aanchal pas-e-mauj-e-sabaa miltaa nahin haakimon ne shahr ke andar fasilein khinch diin din mein bhi ab koi darvaaza khulaa miltaa nahin itne be-parvaa iraade itne be-taufiq gham haath uThte hain magar harf-e-duaa miltaa nahin"

"ummid kaa baab likh rahaa huun patthar pe gulaab likh rahaa huun vo shahr to khvaab ho chukaa hai jis shahr ke khvaab likh rahaa huun ashkon mein piro ke us ki yaadein paani pe kitaab likh rahaa huun vo chehraa to aaina-numaa hai main jis ko hijaab likh rahaa huun sahraa mein vafur-e-tishnagi se saae ko sahaab likh rahaa huun lamhon ke savaal se gurezaan sadiyon kaa javaab likh rahaa huun sab us ke karam ki daastaanein main zer-e-itaab likh rahaa huun"

"dil ki dahliz pe jab shaam kaa saaya utraa ufuq-e-dard se siine mein ujaalaa utraa raat aai to andhere kaa samundar umDaa chaand niklaa to samundar mein safina utraa pahle ik yaad si aai khalish jaan ban kar phir ye nashtar rag-e-ehsaas mein gahraa utraa jal chuke khvaab to sar naamaa-e-taabir khulaa bujh gai aankh to palkon pe sitaaraa utraa sab ummidein mire aashob-e-tamannaa tak thiin bastiyaan ho gaiin gharqaab to dariyaa utraa"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"