raat hai raqs-kunaan ek ghazal ho jaae — Dharmendr Nath

"bandagi mein aae jab vahm-o-gumaan ke faasle baDh gae kitne jabin-o-aastaan ke faasle ho agar ehsaas to vo hai rag-e-jaan ke qarib sochiye to hain zamin-o-aasmaan ke faasle rizq kaa zaamin to hai parvardigaar-e-kaaenaat jaan-levaa kyon hain phir dast-o-dahaan ke faasle kab kahein kis se kahein kaise kahein kyaa kyaa kahein haal-e-dil kahne mein haail hain zabaan ke faasle 'azm-e-mohkam ho to manzil ho hi jaati hai nasib raah ki dushvaariyaan kaisi kahaan ke faasle mahv ho jaae anal-haq ki sadaa mein jab vujud khatm ho jaate hain naaqus-o-azaan ke faasle zindagi ki raah mein darpesh hain dushvaariyaan in-o-aan ke pech-o-kham sud-o-ziyaan ke faasle"

"chaman sajaa na sake gul hi kuchh khilaa to chale hamaare baa'd bahaaron kaa silsila to chale gila nahin ki hamein jaam-e-mai milaa na milaa tujhe ham apnaa lahu zindagi pilaa to chale koi to khaak-basar Dhaaegaa ye qasr-e-sitam jafaa-o-jaur ki buniyaad ham hilaa to chale mujhe yaqin hai nai subh jald aaegi sitaara-haa-e-shab-e-yaas jhilmilaa to chale jo be-zabaan the unhein bakhsh di hai goyaai bujhe dilon ko nayaa hausla dilaa to chale siyaah-bakhton ko ham ne payaam-e-subh diyaa ghurur-e-tira-shabi khaak mein milaa to chale khamosh rahne se hoti hai zulm ki taaid nahin kuchh aur to zulmat kaa hi gila to chale"

"shu'ur-e-'ishq hai to be-niyaaz-o-be-gumaan ho jaa shi'aar-e-'ishq ye hai aap apnaa raaz-daan ho jaa agar hai aarzu-e-rif'at-e-fikr-o-nazar dil mein ba-faiz-e-khaaksaari tu zamin par aasmaan ho jaa tu hi hai markaz-e-hasti tu hi hai makhzan-e-hasti nazar se parda-e-ghaflat uThaa de jaavedaan ho jaa agar hai jazb-e-dil saadiq khamoshi khud hi bolegi na le ehsaan zabaan kaa khud hi sar-taa-paa zabaan ho jaa tiri hasti hi kyaa hai guunj hai ye saaz-e-fitrat ki ham-aahang-e-sadaa-e-saaz ho kar naghma-khvaan ho jaa jahaan-e-aab-o-gil mein hai bazaahir jalva-e-kasrat ye vahdat kaa tamaashaa hai tu is kaa raaz-daan ho jaa ghulaam-e-rang-o-bu ban kar na ji tu sahn-e-gulshan mein 'aqidat ke gulistaan ki bahaar-e-be-khizaan ho jaa sukhan-goi baraae-daad hai ik sa'i-e-laa-haasil mohabbat ki zabaan hi likh dilon kaa tarjumaan ho jaa"

"gham hon kitne hi magar lab pe tabassum rakhiye zindagi khud hai ghazal is mein tarannum rakhiye haal-e-dil khud hi kahaa jaae to kyaa baat rahi rah ke khaamosh bhi andaaz-e-takallum rakhiye bazm-e-hairat hai jahaan dekhiye raunaq us ki misl-e-aaina magar chehre ko gum-sum rakhiye bazm-e-rindaan mein bhi aadaab rahein pesh-e-nazar saamne shauq se phir jaam hi kyaa khum rakhiye fikr-o-ehsaas ki duuri se bikhartaa hai vujud qalb aur zehn mein kyon koi tasaadum rakhiye zindagi kaavish-e-paiham ke sivaa kuchh bhi nahin ho ke gharqaab bhi maujon mein talaatum rakhiye kijiye dasht-navardi to 'ibaadat ki tarah khaak-paimaa hain to ehsaas-e-tayammum rakhiye rukh pe ubhre na shikan mauj-e-havaadis se kabhi dil ki gahraai mein bhi vus'at-e-qulzum rakhiye TuuTe jab shisha-e-dil aae na baahar aavaaz guunj mein naghma-e-mahfil ki use gham rakhiye"

"maanaa abhi nishaan-e-numud-e-sahar nahin main tirgi-e-shab kaa magar nauhagar nahin kahtaa hai kaun husn-e-azal jalva-gar nahin jalve to har taraf hain shu’ur-e-nazar nahin ehsaas-o-fikr is liye ab hain bujhe bujhe raushan sutun-e-daar pe koi bhi sar nahin is daur ke bashar kaa muqaddar hai gumrahi hai 'aql khaam-kaar junun mo'tabar nahin jiine kaa ho shi'aar to ik lamha bhi bahut hai mukhtasar hayaat magar mukhtasar nahin jis ko bhi dekhiye vo hisaar-e-anaa mein qaid itnaa baDhi khudi ki khudaa ki khabar nahin me'raaj-e-hosh ye hai ki apni khabar na ho hai baa-khabar vahi jise apni khabar nahin kashkol-e-dil hai daulat-e-imaan se maalaa-maal shukr-e-khudaa hai paas mire sim-o-zar nahin tauqir jo mili vo buzurgon kaa faiz hai vaise to apni zaat mein koi hunar nahin"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"

"jahaan-e-dard-o-gham hai aur main huun tiraa naqsh-e-qadam hai aur main huun kisi ki aankh nam hai aur main huun vufur-e-shauq kam hai aur main huun mujhe hai daulat-e-kaunain haasil mire rab kaa karam hai aur main huun main apne aap ko pahchaantaa huun miraa apnaa bharam hai aur main huun yahi kyaa kam hai duniyaa-e-vafaa mein mujhe ehsaas-e-gham hai aur main huun kisi ki yaad kaa ehsaan hai mujh par sukun-e-dil baham hai aur main huun mujhe 'mahmud' koi Dar nahin hai miraa apnaa qalam hai aur main huun"