taskin bas anaa ki kiye jaa rahe hain aap — Euphonic Amit

"is shahr-e-be-vafaa se sharik-e-vafaa na maang mirzaa yahaan tu apne liye saahibaa na maang ye mashvara hai meraa abhi dil-rubaa na maang ho jaaegaa ghurur tujhe aaina na maang ye raah-e-bandagi hai ise sahl mat samajh duniyaa ki gar talab hai tujhe to khudaa na maang ham ne tujhe hamesha sar aankhon pe hai rakhaa ghairon ke dil mein apne liye tu jagah na maang vo hai sabab maraz kaa miyaan chaaraagar nahin us zahr dene vaale se koi davaa na maang jo de rahaa hai gham vahi khushiyon ki vajh thaa us ke liye khudaa se koi bhi sazaa na maang nazron se mai pilaanaa to ehsaan thaa tiraa mujh se koi hisaab mire saaqiyaa na maang dariyaa mein tu bahaa de sabhi nekiyaan 'amit' achchhaaiyon kaa apni kisi se sila na maang"

"kab talak is khaamushi ki tarjumaani ho 'ishq kaa izhaar ab to munh-zabaani ho mehmaan dil ke bano to mehrbaani ho kab talak is dard-e-dil ki mezbaani ho kis ke ashkon ne kiyaa khaaraa samundar ko ab 'ataa saagar ko bhi kuchh miThaa paani ho lutf aataa hi nahin auron ko paDhne mein darj pannon mein hamaari bhi kahaani ho peD kaT ke bhi kisi kaa ghar banaataa hai kaam aae sab ke aisi zindagaani ho khaamushi ko ham vahaan apnaate hain aksar bolnaa apnaa jahaan bhi be-ma'aani ho kas ke baanhon mein use baiThaa huaa hai vo ziist jaise ye 'amit' ki jaavedaani ho"

"aazmaane ki zamaane ko zarurat kyaa hai ham se puchho to bataa deinge mohabbat kyaa hai ham ne piir aur faqiron se bahut puchhaa magar jab huaa 'ishq to jaanaa ki 'ibaadat kyaa hai ham ko aataa nahin khaamoshiyaan paDhne kaa hunar vo hi batlaa dein unhein ham se shikaayat kyaa hai meri ghazlein vo paDheinge to samajh jaaeinge bandagi kyaa hai junun kyaa hai 'aqidat kyaa hai aap ne jis ko farishte kaa diyaa thaa darja us ki insaanon si fitrat hai to hairat kyaa hai un se bichhDe to 'amit' aayaa samajh ye ham ko shaakh se TuuTe hue patton ki qimat kyaa hai"

"meri saanson mein ghuTan chhoD ke jaa sakte ho tum mujhe 'ahd-shikan chhoD ke jaa sakte ho apni yaadon mein magan chhoD ke jaa sakte ho tum hamein tanhaa sajan chhoD ke jaa sakte ho jujhne ki mujhe 'aadat hai pareshaani se mere maathe pe shikan chhoD ke jaa sakte ho lauTne kaa kabhi apnaa mujhe vaa'da do to tum judaai ki chubhan chhoD ke jaa sakte ho kyaa miri Diary ke safhon pe jaate jaate daulat-e-she'r-o-sukhan chhoD ke jaa sakte ho apne honTon se mire honTon pe kyaa jaan-e-jaan ek miThi si chhuvan chhoD ke jaa sakte ho 'ishq aur farz mein gar ek hi chunnaa ho 'amit' to adhuraa ye milan chhoD ke jaa sakte ho"

"pankh hi kaafi nahin parvaaz ko toDnaa hogaa qafas bhi baaz ko sach kaho to kaaT dete hain zabaan hausla bhi chaahiye aavaaz ko taaliyaan jhuTi bajein to kyaa maza ho hunar to hi bajaao saaz ko tum bharosa aur dil mat toDnaa raaz rakkho tum sabhi ke raaz ko jo milaa ham ko usi mein khush rahein duur rakkhein khud se hirs-o-aaz ko ittifaaqan 'ishq un se ho gayaa kaise samjhaaein dil-e-naa-saaz ko paDh ke 'ghaalib' 'mir' ki ghazlein 'amit' shaa'iri ke tu samajh andaaz ko"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"murattab aur bhi ik goshvaara ho rahaa hai to kyaa hai gar abhi ham ko khasaara ho rahaa hai hamaare paas to ham se ziyaada tu nahin thaa so tu kyaa ab to khud se bhi kinaara ho rahaa hai hamaare khvaab mein ahmiyat-e-shab thi ziyaada so ab vo khvaab aankhon mein sitaara ho rahaa hai tumhaari aarzu hone se pahle bhi to ham the guzaara ho rahaa thaa so guzaara ho rahaa hai hayaa-aalud aankhein hain na aanchal hai na chilman ye kis viraan duniyaa kaa nazaara ho rahaa hai abhi ham faisla karne ki ujlat mein nahin hain magar lagtaa hai jiine se khasaara ho rahaa hai khalaa se is zamin par sang-rezo ki ye baarish kisi jaanib se kyaa koi ishaara ho rahaa hai"

"choT par choT khaa rahaa huun main 'aadatan muskuraa rahaa huun main us ke uupar to kuchh asar hi nahin apnaa dil kyon jalaa rahaa huun main aaj tanhaai mein jo baiThe ho kyaa tumhein yaad aa rahaa huun main kaun aaegaa mujh se milne ko apnaa ghar kyon sajaa rahaa huun main aaj ji bhar ke dekh lo mujh ko ab bahut duur jaa rahaa huun main kyaa tumhein ab bhi kuchh shikaayat hai ab to sab kuchh kamaa rahaa huun main haath mein Digriyaan sajaae hue Thokarein kitni khaa rahaa huun main ab mujhe peT in se bharnaa hai ye jo khanjar banaa rahaa huun main kal koi is ko bhi na chhoDegaa ye jo paudaa lagaa rahaa huun main"