teraa har gham churaa liyaa hotaa — Beena Goindi

"un ki aamad se jo armaan machal jaate hain khud-bakhud raah ke aasaar badal jaate hain ham to un logon mein shaamil hain hamaaraa kyaa hai jo umidon ke sahaare hi bahal jaate hain meri aankhon mein tire hijr ke aansu hain jame vo mire jazbon ki hiddat se pighal jaate hain subh-e-saadiq ki tarah ujle hain jazbe un ke jo bure vaqt mein gir ke bhi sambhal jaate hain aisaa insaan ki jis kaa koi gham-khvaar na ho aise insaan ko haalaat nigal jaate hain meri aankhon se bhalaa khushk hon aansu kaise kyaa kabhi chhoD ke paani ko kanval jaate hain"

"kaTi patang huun main aur be-sahaaraa huun mujhe kahaa nahin us ne ki main tumhaaraa huun ye mujh mein aatish-e-be-soz jalti rahti hai main raushni huun main jugnu huun istiaara huun tire husul ki gardish mein kho gai huun main mujhe bataa ki main zarra huun yaa sitaaraa huun main ek qatra-e-shabnam huun dida-var ke liye jo kaj-nigaah hain un ke liye sharaara huun main ek umr se bunti huun khvaab chaahat ke hisaar-e-dida-e-nam-naak mein khasaara huun"

"chaandni-raat mein bulaaun tujhe dhaDkanein dil ki main sunaaun tujhe tere pahlu mein rakh ki dil apnaa chaand-raaton mein gungunaaun tujhe kuchh kahe an-kahe savaal karun aur yuun phir se aazmaaun tujhe apni hasti ko bhuul sakti huun kaise mumkin hai bhuul jaaun tujhe aansuon ki tapish mein jalti huun kaash is mein kabhi jalaaun tujhe"

"aur havaa duun dil mein aag bhaDakti ko shoala shoala raakh kare jo hasti ko dil thaa ek bagulaa hijr ke sahraa mein naach rahaa thaa le kar vasl ki masti ko aankh ke nakhlistaan mein ret bikharti hai kaun saa rasta jaataa hai is basti ko gaanv se jo khvaab uThaa kar niklaa thaa shahr mein aa kar bhuul gayaa pagDanDi ko meraa dil to khaali hai ab dhaDkan se kaise koi dekhe nabz dhaDakti ko"

"jise nazron ki surat apni aankhon mein basaayaa thaa usi ik khvaab ne har moD par mujh ko rulaayaa thaa tire ik qahqahe ne jis ko ik pal mein giraa Daalaa gharaundaa vo to main ne apne ashkon se banaayaa thaa khushi se uDte uDte aa gae is shaakh par bhanvre jahaan kaanTon ne us ki maut kaa saamaan sajaayaa thaa sitaaraa ye zamin bhi aasmaan kaa ek TukDaa hai jise roz-e-azal shaayad khudaa ne aazmaayaa thaa mere honTon pe 'binaa' muskuraahaT yuun machalti thi ki main ne hasraton ko apne sheron mein chhupaayaa thaa"

"aakaash pe baadal chhaae the aankhon ne ashk bahaae the nayyaa ko bhanvar mein dekhaa thaa jab mausam pyaar ke aae the ik lafz na aayaa honTon par lamhe be-dard to aae the kuchh giit sune the bachpan mein kuchh miThe khvaab churaae the 'binaa' ke man mein dhuup rahi aankhon mein ThanDe saae the"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"shab ki taarik raahdaari hai aur miraa khauf iztiraari hai sabz khvaabon ki kam se kam qimat zindagi bhar ki ashk-baari hai ik musallat-shuda tamaddun ko ye na kahiye ki ikhtiyaari hai shash-jihaati mushaahida hai miyaan tajrabon ki sanad pe bhaari hai shukriya aap ki mohabbat kaa dil kaa maqsum sogvaari hai tajziye sun ke muskuraa denaa apni itni hi zimmedaari hai"

"ye hai mai-kada yahaan rind hain yahaan sab kaa saaqi imaam hai ye haram nahin hai ai shaikh ji yahaan paarsaai haraam hai jo zaraa si pi ke bahak gayaa use mai-kade se nikaal do yahaan tang-nazar kaa guzar nahin yahaan ahl-e-zarf kaa kaam hai koi mast hai koi tishna-lab to kisi ke haath mein jaam hai magar is pe koi kare bhi kyaa ye to mai-kade kaa nizaam hai ye janaab-e-shaikh kaa falsafa hai 'ajib saare jahaan se jo vahaan piyo to halaal hai jo yahaan piyo to haraam hai tujhe apne husn kaa vaasta mere shauq-e-did pa rahm khaa zaraa muskuraa ke naqaab uThaa ki nazar ko shauq-e-salaam hai na sunnaa to huur o qusur ki ye hikaayatein mujhe vaa'izaa koi baat kar dar-e-yaar ki dar-e-yaar hi se to kaam hai na to e'tikaaf se kuchh gharaz na savaab-o-zuhd se vaasta tiri diid aisi namaaz hai na sujud hai na qayaam hai ye durust ki 'aib hai mai-kashi ye ba-jaa ki baada haraam hai magar ab savaal ye aa paDaa ki tumhaare haath mein jaam hai jo uThi to subh-e-davaam thi jo jhuki to shaam hi shaam thi tiri chashm-e-mast mein saaqiyaa miri zindagi kaa nizaam hai miraa farz hai ki paDaa rahun tiri baargaah mein saaqiyaa koi tishna-lab hai ki sair hai yahi dekhnaa tiraa kaam hai isi kaaenaat mein ai 'jigar' koi inqalaab uThegaa phir ki buland ho ke bhi aadmi abhi khvaahishon kaa ghulaam hai"