vabaal mere mahalle ko naam hai teraa — Aziz Akhtar

"jo luT gayaa to har ik saaz dastiyaab huaa bhaTak ke raah talaashi to kaamyaab huaa miri hi chashm se sairaab vo saraab huaa main ho gayaa koi kaanTaa to vo gulaab huaa savaal karte zamaane guzar gae mujh ko sukut kar liyaa to phir vahi javaab huaa bhulaa ke khud ko har ik dil hai dekhne mein lagaa kise mili koi neamat kise azaab huaa hazaar log hue hain magar ziyaada der bataao kaun saa jhuTaa yahaan janaab huaa saron ke taaj hue qaum ke chhupe rustam bahut sataayaa gayaa jo khuli kitaab huaa tiri judaai ke din bhi bahut bure the magar ghamon kaa chhoD ke jaanaa bahut kharaab huaa haqiqaton ki haqiqat jo ho gai maa'lum 'aziz' dekh miraa rom-rom khvaab huaa"

"khudaa ne us ko koi gham nahin dikhaayaa thaa ajiib shakhs thaa jaane kahaan se aaya thaa ye kyaa sitam hai ki yaad aa rahaa hai tu phir se abhi abhi to tujhe meri jaan bhulaayaa thaa mire khudaa vo kisi aur ki panaah mein hai vo jis ko tu ne mire vaaste banaayaa thaa luTaa diyaa hai jo kuchh milkiyat mein thaa apni tire liye hi kamaayaa thaa jo kamaayaa thaa utar gayaa hai kisi aur ke vajud mein vo jo ek shakhs miri zaat mein samaayaa thaa 'aziz' qatl bhi kis ne kiyaa hai dekh zaraa vo jaan pe khel ke apni jise banaayaa thaa"

"ye tiir hosh-rubaa hai magar kamaan nahin zamin dhoke mein rakkhegi aasmaan nahin mire bhi saamne lab ko zaraa si jumbish dein mujhe mili hai khabar aap be-zabaan nahin ujaaD sahraa kharaaba ban aur viraana har ek shai hai miraa ghar magar makaan nahin hai ikhtiyaar zamin par to aasmaan ki havas janaab aap ab itne bhi kuchh mahaan nahin vo shakhs meri mohabbat hai aur main us ki magar hamaaraa koi ek khaandaan nahin hai ik fareb ye maktub phaaD dein is ko adu ke lafz hain ye sab miraa bayaan nahin karaae us se na hargiz bhi koi rakhvaali vo ek chor hai ik chor paasbaan nahin 'aziz' hosh mein aa jaa ki asl duniyaa hai ye kohkan ki yaa majnun ki daastaan nahin"

"shor kartaa hai jo dil us kaa badal kahne de kaam sau kar liye ab yaar ghazal kahne de khasta-haali ko tiri maan liyaa Thiik hai chal gul nahin to mujhe tujh ko tu kanval kahne de saath hain ham to kaheinge hi kai baatein log kahne vaalon ko haTaa yaar nikal kahne de vo mohabbat hai vo hi us ki nishaani hai 'aziz' is liye mujh ko use taaj-mahal kahne de"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"kal shab dil-e-aavaara ko siine se nikaalaa ye aakhiri kaafir bhi madine se nikaalaa ye fauj nikalti thi kahaan khaana-e-dil se yaadon ko nihaayat hi qarine se nikaalaa main khuun bahaa kar bhi huaa baagh mein rusvaa us gul ne magar kaam pasine se nikaalaa Thahre hain zar-o-sim ke haqdaar tamaashaai aur maar-e-siyah ham ne dafine se nikaalaa ye soch ke saahil pe safar khatm na ho jaae baahar na kabhi paanv safine se nikaalaa"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"